An d’Gemengegewerkschaft FGFC gëtt net aus den Diskussiounen iwwert eng nei Konventioun ausgeschloss. Dat huet de Mobilitéitsministère e Méindeg an der Mëttesstonn matgedeelt.
D’FGFC hat der Mobilitéitsministesch Yuriko Backes Arroganz virgeworf, well d’Personaldelegatioun bei engem Treffen e Méindeg ausgeluede gi wier. D’Ministesch huet matdeele gelooss, datt d’FGFC bei enger Reunioun de 15. Mäerz informéiert gi wier, datt de Ministère sech mam Bureau vum TICE e Méindeg géing treffen, éier se no deem Treffen nees d’Personaldelegatioun géing gesinn.
D’FGFC fäert, datt Aspuerunge beim interkommunale Bus-Syndikat virgesi wieren an d’Personal d’Laascht soll droen. Dofir fuerdert d’Gewerkschaft, datt d’Situatioun gekläert gëtt. Esou heescht et an engem Communiqué um Méindeg de Moien.
