Wéi aus enger offizieller Statistik, déi e Sonndeg publizéiert gouf, ervirgeet, goufen a ganz Indien 3.167 Tigeren a Fräiheet gezielt. Dat sinn der 200 méi ewéi bei der leschter Zielung am Joer 2019. Nach virun e puer Joerzéngten war d’Zuel vun den Tigeren am Land allerdéngs däitlech méi héich.
Indien ass dat Land an deem weltwäit déi meeschten Tigere liewen. Wéi den indesche Premier Modi e Sonndeg bei engem Evenement am Süde vum Land sot, géife 75 Prozent vun den Tigeren op der Welt an Indie liewen. D’Statistik, déi rezent publizéiert gouf, wier en houfrege Moment fir Indien an en Erfolleg fir déi ganz Welt.
