E Méindeg de Moie war den CSV-Député-maire eisen Invite vun der Redaktioun.

D'Trennung vu Buergermeeschter- a Parlamentarier-Mandat misst kommen. Dat sot den neien CSV-Nord-Deputéierte Jean-Paul Schaaf e Méindeg de Mueren am RTL-Interview. Ma d'Roll vum Buergermeeschter misst awer dann och gestäerkt ginn. D'Gemenge géingen nämlech och Regierungspolitik exekutéieren an dofir misst d'Stëmm vun de Gemengen och am legislative Prozess ze héieren sinn. Als Beispill nennt de Politiker d'Gesetz iwwer den Denkmalschutz. Do géing d'Wuert „Gemeng“ 27x virkommen. Dofir wär d'Stëmm vun engem, deen an der Gemeng aktiv ass an deen do och schonn Erfarung gesammelt huet, an der Chamber wichteg. De Jean-Paul Schaaf ënnerstëtzt dofir d'Propos vum Michel Wolter fir eng Chambre des élus locaux an d'Liewen ze ruffen.

Firwat net Plaz maache fir déi méi jonk Generatioun?

Firwat huet de 55-Joer-ale Politiker net Plaz gemaach fir déi méi jonk Generatioun, zum Beispill de Jeff Boonen 35-Joer-al an Nächstgewielten op der Nordlëscht? Dat wär eng spannend Fro, mee hien géing sech op alle Fall net al fillen, sou den Jean-Paul Schaaf. Hien wär mat 28 Joer an de Gemengerot komm, mat 38 fir d'éischt Buergermeeschter an mat 39 fir d'éischt an der Chamber. Elo hätt hien eng laang Paus gehat, mä hie kéint vill méi Erfarung a vill méi Wësse matbréngen, esou eisen Invité.

D'Wuesstëmsfro als Prioritéit
Et ass keng Première an der Chamber fir den Député-maire. Hie souz schonn tëscht 2004 an 2013 um Krautmaart fir d'CSV. Nei ass awer de Rôle an der Oppositioun. Een Thema wat den Jean-Paul Schaaf do wëll opgräifen, ass d'Fro vum Wuesstem. D'Gemenge wären all dobäi hir PAGen nei ze maachen an déi global Feststellung wär, dass d'Gemenge wéilte moderat wuessen, 1,5-2,5 Prozent. D'Regierung wär duerch déi sozial Versécherungssystemer an der Wuesstëmsflicht 3-4 Prozent. An engem Land mat begrenzten Territoire kéint een awer net onendlech wuessen, esou de Jean-Paul Schaaf.

Wou ass de Gemengefusiounsprojet Nordstad drun?
De Gemengefusiounsprojet "Nordstad" wier wéinst der Pandemie e bëssen ofgebremst ginn. Notamment wat d'Biergerbedeelegung ugeet, esou den Ettelbrécker Buergermeeschter. An awer hätten et produktiv Gespréicher ginn. Et hätt ee faktesch Analysë gemaach vun den Daten: wéi grouss sinn d'Gemengen, wéi ass d'Populatiounsstruktur, wéi héich sinn d'Verscholdungen etc.  Donieft ginn Biergerforen an online Befroungen organiséiert, fir de Bols ze fillen. Aus dem Ganzen géing ee Konzept geschriwwen ginn an dann Ufank 2021 missten d'Gemengeréit vun Ettelbréck, Dikrech, Schieren, Bettenduerf an Ierpeldeng dovunner Kenntnis huelen an deem zoustëmmen an da kéint de Fusiounsprozess an déi nächsten Etappe goen. Do géing dann e Fusiounsprojet geschriwwen ginn an da bräicht een nach déi finanziell Zouso vun der Regierung, déi ee bis ewell net kritt hätt. Ufank 2022 kéint dann e Referendum sinn. Den Timing fir am Juni 2023 offiziell eng Nordstad-Fusiounsgemeng ze hunn, wär zwar ambitiéis, mä géing bestoe bleiwen, sou eisen Invité.

Firwat huet de Projet Nordstad sou laang gedauert?
Et wär ni d'Zil gewiescht ze fusionéieren, sou den Jean-Paul Schaaf. Am Ufank hätt ee just wëllen der Landesplanung gerecht ginn, déi gefuerdert huet et misst een Centre de développement et d'attraction ronderëm d'Stied Dikrech an Ettelbréck entstoen. D'Fusioun war duerno de logesche Schluss. Veräiner a Jugendhaiser hunn antëscht scho fusionéiert ënnert dem Terme Nordstad an et gëtt och een office social «Nordstad». Deemno hätt ee vun der Basis scho vill Akzeptanz gespiert an dat wär och schéin, esou den Ettelbrécker Buergermeeschter.

Invité vun der Redaktioun: Jean-Paul Schaaf

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.