E Méindeg de Moie war den CSV-Deputéierten eisen Invité vun der Redaktioun.

D’CSV geheit dem Premier "Provokatioun" vir. De Xavier Bettel hat de virleschte Weekend gesot, et misst een iwwert en Etat de crise diskutéieren, wann d’Chamber Covid-Mesuren net séier genuch kéint guttheeschen. Déi Ausso wier „total iwwerflësseg an onnëtz“, esou de CSV-Deputéierte Claude Wiseler e Méindeg de Moien hei op RTL.

D’Chamber wier komplett funktiounsfäeg an et géing iwwerhaapt kee Gronn ginn, fir vun engem Etat de crise ze schwätzen. Iwwerflësseg wier d’Ausso vum Premier dann och, well déi zwee lescht Regierungsréit souwisou näischt decidéiert hätten, an der Chamber keen Text virgeluecht hätten.

D’CSV ass iwwregens der Meenung, datt weider Mesurë missten decidéiert ginn, wann d’Covidzuele sech an deene nächsten 2 oder 3 Deeg um aktuellen héije Niveau stabiliséieren. Deen héije stabele Niveau géing nämlech dem Claude Wiseler no net duergoen, well d’Spideeler géingen dat net packen. Mesurë proposéiert d’CSV notamment am Schoulwiesen, well am Géigesaz zu deem wat den Educatiounsminister Claude Meisch géing soen, géing et grouss organisatoresch Problemer an de Schoule ginn. D’CSV freet dowéinst eng Maskeflicht, A- a B-Gruppe fir d’iewescht Klassen am Secondaire, een décalage horaire, Temperaturmoossungen an de Schoulen an eng besser Koordinatioun vun de Mesuren tëscht de Schoulen an de Maison Relaisen.

Donieft misst dem Claude Wiseler no den Télétravail nach méi gepusht a méi präzis Reegele fir den Handel ausgeschafft ginn. Den CSV-Deputéierte vermësst och, datt wärend dem Summer kee Stufeplang op d’Been gesat gouf, fir de Leit an der Economie Previsibilitéit ze ginn nom Prinzip „vun deem Grad un déi do Aktiounen“. Donieft hätt ee missen am Summer d'Diskussioun iwwert e Covidspidol viruféieren an den Tracing an den Testing stäerken. Zanter Juni hätt d’CSV gewarnt et géing eng zweet Well kommen. „Dir gesitt also, eng konstruktiv Politik“, sou de Claude Wiseler. Wéi eng Optiounen d’Regierung hätt, géing d’CSV nach ëmmer net wëssen.

Invité vun der Redaktioun: Claude Wiseler

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.