E Méindeg de Moie war den CSV-Deputé-Maire eisen Invité vun der Redaktioun.

Invitée vun der Redaktioun Marc Lies / Resumé Annick Goerens

Et geet net eleng duer mat Annoncë fir de Logementsproblem an de Grëff ze kréien. Dat sot den CSV-Deputé-Maire Marc Lies e Méindeg de Mueren. Hie war eisen Invité vun der Redaktioun. De 900-Milliounen-Euro-Spezial-Fong, mat deem d'Regierung eng Bau-Offensiv wëll lancéieren, géife just 3.600 Wunnenge vu 75 Metercarré Wunnfläch bedeiten, dat wier net genuch. De Logementsminister Henri Kox hätt an der Emissioun Background zwar vu 5.600 Wunnenge geschwat, déi solle gebaut ginn, ma ouni Prezisioune wien, wou a wéini soll gebaut ginn. Déi pragmatesch Aarbecht hannert den Annoncë géif feelen. Scho virun 7 Joer hätten déi deemoleg Ministesch Maggy Nagel an och de Premier Bettel gesot, et géingen elo am Eilverfahren 10.000 Wunnenge gebaut ginn. Wéini dës solle gebaut ginn, wär awer ni gesot ginn.  

Et geet net vun haut op muer

Natierlech géinge sech d'Problemer net vun haut op muer léisen. Och d'CSV war joerzéngtelaang um Rudder, ouni dass de Problem konnt geléist ginn. Dorop äntwert den Deputéierte Marc Lies, dass jo och Efforte gemaach gi wären, notamment de Pacte Logement 1.0 ënnert dem Jean-Claude Juncker. Do gouf ënner anerem d'Virkafsrecht fir d'Gemengen an d'Extensioun vum Perimeter als Instrumenter drageschriwwen. D'Offer wär de Problem. D'Demande wär méi grouss, wéi d'Offer, an dofir wären d'Outile vum Virkafsrecht fir d'Gemengen an och der Extensioun vum Perimeter am urbane Raum wichteg. D'Virkafsrecht gouf awer lescht Joer duerch een Urteel vum Verwaltungsgeriicht an duerno duerch eng Circulaire vum Inneministère quasi komplett neutraliséiert a bis haut schléissen déi Gréng eng Erweiderung vum Perimeter aus.

„Mir ginn vum Ëmweltministère ausgebremst“

Wat d'Extensioun vum Perimeter ugeet, do géifen d'Gemengen dacks vum Ëmweltministère ausgebremst ginn, erkläert den Marc Lies. Als Buergermeeschter vun Hesper kéint hie selwer e Liddchen dovunner sangen. Bei der Nei-Entwécklung vun den Bebauungspläng hätt d'Gemeng Hesper zum Beispill wéilten eng kleng Extensioun vum Perimeter vun 1,8 Hektar maachen, wou d'Gemeng zu 76 Prozent Proprietär vum Terrain war, mä gouf ausgebremst. Dat wär eng ideal Plaz gewiescht, fir abordabele Wunnraum ze schafen, sou de Marc Lies.

De Plan d'Action local Logement, „den gefätt mir definitiv guer net“

Dëse Plang ass e weideren Outil vun der Regierung, ma wier eigentlech just eng administrativ Hürd. D'Gemenge hunn elo schonn missen hiren PAG fäerdeg maachen, eng ganz Rei wären do nach an der Prozedur. Elo missten déi 102 Gemengen duerch dësen Outil vum Wunnengsbauministère awer nees e Plang maachen, wou si wéilten abordabele Wunnraum schafen. Mä sou einfach wär dat net. Muer kéint awer e Proprietär bei d'Gemeng kommen a soen, hien wéilt säin Terrain verkafen, ma dat wär net forcement an de nächsten 12 Méint. Och de Syvicol fënnt, dass dat wierklech net de beschten Outil wär.


Och beim Baulandvertrag huet de Marc Lies seng Douten

De Baulandvertrag ass jo een Instrument, dat virgesäit, datt, wann ee privaten Terrain an de Bauperimeter bannent enger gewëssener Zäit kënnt, dann och muss bebaut ginn. Geschitt dat net, gëtt den Terrain als Gréngzon zeréckklasséiert a verléiert esou u Wäert. D'DP géing deen als Wonnerwaff gesinn, ma wann et zum Beispill méi ewéi ee Proprietäre gëtt, wär et enorm komplizéiert, administrativ ëmzesetzen, erkläert den CSV-Deputéierte Marc Lies.
 
D'Reform vun der Grondsteier ass net ze evitéieren

Wann een kuckt, dass d'Valeur unitaire vun der Grondsteier op 1941 zeréckgeet, misst onbedéngt dru geschafft ginn. Et missten awer och nach aner Wäerter wéi nëmmen den Terrain consideréiert ginn. Och wat drop ka gebaut ginn, misst e Critère sinn, do notamment d'Baudicht. Een Terrain vun 20 Ar kéint mat enger Dicht vun 500 Quadratmeter bebaut ginn oder mat enger Dicht vun 1000 Quadratmeter oder 2000 Quadratmeter. Een Terrain géing natierlech doduerch valoriséiert ginn, wat een méi dicht baut, erkläert den CSV-Deputéierte.

Mir brauchen eng  Spekulatiounstax

Et misst een natierlech eng Tax op net-bebauten Terraine ganz virsiichteg ugoen. Mä wann een elo keng Spekulatiounssteier besonnesch och op Terrainen an den Baulücken mécht, dann hu mer Muer oder Iwwermuer e grousse Problem, sou de Marc Lies. Och do géing d'Baudicht spille fir erauszefannen, wéi eng Valeur sou een Terrain huet.

Iwwerdeems wär eng Tax op eidel-stoend Wunnengen extrem schwéier ëmzesetzen. Besonnesch, well et net einfach wär erauszefannen, wéini d'Leit wierklech erausgeplënnert sinn. Do géing et een aneren Outil ginn, nämlech verstäerkt ze sensibiliséieren, dass esou Wunnengen an d'gestion locative sociale ginn.

Invité vun der Redaktioun Marc Lies

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.