En Donneschdeg de Moie war den Interims-Generelsekretär vun der CSV den Invité vun der Redaktioun.

"Ech muss mer dat nach iwwerleeën, dofir brauch ech nach e bëssen Zäit. Et mécht mer Spaass, mä ech wëll och meng Fräiheete behalen, souwuel als Deputéierte wéi och am Privaten."

Esou reagéiert de Paul Galles op d’Fro, ob hien och nom nächsten CSV-Kongress nach Generalsekretär vun der Partei wéilt bleiwen. Den Invité vun der Redaktioun vun en Donneschdeg mécht jo den Ament op deem Posten den Interim, well de Félix Eischen sech aus gesondheetleche Grënn zeréckgezunn huet.

Ob um Kongress Ekippe wäerten untrieden oder ob et méi Kandidature gëtt, dat wéisst een alles nach net. Hie géing op alle Fall mat jidderengem gutt zesummeschaffen. Och mam aktuelle Parteichef Fränk Engel wier d'Relatioun ganz gutt.

D'CSV géing sech am Moment erneieren. A 5 Aarbechtsgruppe soll sech thematesch nei ausgeriicht ginn. Méi wéi 200 Leit hätte sech ageschriwwen. Am Laf vum Joer sollen op engem thematesche Kongress d'Conclusioune mat de Memberen diskutéiert ginn. Als Chrëschtlech Sozial Vollekspartei géing ee wuel nach Jonker erreechen. Et wier een nohalteg an et géing een e breeden Deel vun der Gesellschaft uschwätzen. Et géif een och nach dru gleewen, datt d'Gesellschaft iwwer dem Individualismus steet.

Zu der Affär Monica Semedo seet de Paul Galles, datt d'Leit lo net de Feeler dierfte maache, fir ëmgedréint déi concernéiert Europadeputéiert ze mobben.

Ganz schlëmm wier awer d'Verhale vun der DP, déi versicht hätt, dat Ganzt ënner den Teppech ze kieren. Hie géing der liberaler Parteispëtzt och net gleewen, datt een näischt dovunner soll gewosst hunn, sou de Paul Galles. De Sëtz am EU-Parlament gehéiert an den Ae vum CSV-Deputéierten awer der Partei.

A punkto Corona hätt een anescht wéi d'Regierung eng kloer feuille de route beim Vaccin op den Dësch geluecht, sou den CSV-Generalsekretär. D'Impfzentere wiere geografesch och anescht verdeelt ginn. Datt ee vu Rouspert misst op Munneref fueren, wier net glécklech.

Mat der CSV an der Regierung wier den Horesca-Secteur wuel éischter zougaangen, dann hätt ee vläicht och éischter kënnen opmaachen.

Am Moment wieren d'Restauranten a Caféë wuel awer och mat enger CSV um Rudder net nees op.

Hie wier iwwregens dovunner iwwerzeegt, datt d'Impfbereetschaft zu Lëtzebuerg nach wäert wuessen, sou nach den Interims-Generalsekretär vun der CSV.

Invité vun der Redaktioun: Paul Galles

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.