Den Erling Haaland hat drop gehaen, an och den deemolege Krounprënz an haut Kinnek Haakon huet domat de Rhythmus vun engem spezielle WM-Summer virginn. Déi faméis "WM-Trommel" ass fir e gudden Zweck versteet ginn a war engem onbekannte Bidder 1,3 Milliounen norwegesch Kroune wäert. Ëmgerechent ronn 123.000 Euro.
32 Leit haten am Ganzen 277 Mol drop gebueden. "D'WM-Trommel ass eenzegaarteg, an d'Geschicht, déi se erzielt, och", sou de Knut Petter Gisholt, dee fir d'Auktioun zoustänneg war. "Wärend der WM huet se Eenegkeet symboliséiert, Leidenschaft a groussaarteg Momenter, déi mir zesummen erlieft hunn. Duerch d'Spendenaktioun huet se elo eng Geschicht dobäi kritt. Si bréngt op en Neits Leit zesummen a suergt fir Engagement, déi Kéier fir e wichtegen Zweck." D'Geld geet un d'Flüchtlingshëllef.
Fest steet, dass d'Trommel vun enger Persoun mat engem gutt gefëllte Portmonni kaaft ginn ass, sot de Sebastian Husvik, Virsëtzende vun der norwegescher Fan-Gruppéierung. Hie geet dovun aus, dass de Keefer de Wäert vun deem historesche Stéck aus der norwegescher Futtballgeschicht ze schwätze weess.
