D’Musel Pikes wannen an eegener Hal mat 57:55 géint d’Black Frogs Schieren. Domat wënnt d’Ekipp vum Trainer Philip Dejworek d’Serie mat 2:0 a bleift an der LBBL.
D’Pikes hu sech an der éischter Hallschecht vum Match ofgesat, dat ënner dem Impuls vum Amerikaner Tai Bibbs, deen 20 Punkte bis zur Paus markéiere konnt an dofir gesuergt huet, dass d’Lokalekipp 40:28 a Féierung louch.
Schieren huet sech allerdéngs zeréck an de Match gekämpft an de Match sollt an de leschte Sekonnen entscheet ginn. D’Gäscht haten eng leschte Chance de Match ze gewannen, 0,6 Sekonne waren nach op der Auer. E schwéiere Worf vum Amerikaner Desean Hampton huet d’Zil net fonnt an d’Pikes setze sech knapp mat 2 Punkte Virsprong duerch.
Den Tai Bibbs (25 Punkten) an de Jalen Green (19) waren déi stäerkste Spiller bei der Lokalekipp.
Domat sinn am Basketball-Championnat bei den Hären all d’Entscheedunge vun der Saison 2023/24 gefall. Opgestigen an d’LBBL sinn Hiefenech a Munneref, d’Ofsteiger an d’Nationale 2 heesche Kordall Steelers a Gréngewald Hueschtert.
