Mëll Temperaturen, naasst WiederVu Mëtt Februar bis Mëtt Abrëll ginn d'Mouken nees op Wanderschaft

An deem Kader setzt sech natur&ëmwelt zesumme mat der Naturverwaltung dofir an, dass d’Stroossen hei am Land méi sécher gemaach gi fir d’Amphibien. An dofir muss een hir Wanderstrecke kennen. Nëmmen esou kann ee Stroosse spären oder Rettungsaktiounen op fir si geféierleche Strecken organiséieren, ma och laangfristeg Léisunge sichen. An deem Sënn sinn d’Verwaltungen an d’Mouken op d’Hëllef vu baussen ugewisen.

Sou kënnt Dir d’Aktioun ënnerstëtzen

• Wann Dir Mouke gesitt, déi op enger Plaz iwwer d’Strooss wanderen, maacht eng Foto a schéckt se op iNaturalist oder Dir fëllt den Online-Formulaire aus.
• Maacht bei organiséierte Rettungsaktioune mat. Dofir kënnt Dir am Géoportail op ee vun de grénge Wanderiwwergäng klicken, bei deene schonn esou eng Aktioun geplangt ass.
• Organiséiert selwer eng Rettungsaktioun an invitéiert iwwer e Formulaire op Är Rettungsaktioun, an deem Dir d’Aart vun der Rettungsaktioun ugitt.

Weider Informatiounen zur Organisatioun vu Rettungsaktioune fannt Dir hei.

Wisou wanderen d’Mouken iwwerhaapt?

Fir sech Fortzeplanzen, brauche Mouke Waasser. Liewe maache si awer u Land, respektiv a Bëscher. Do iwwerwantere si och, ier si sech op de Wee an hir Dëmpele maachen. Si ginn och net bei egal wéi ee Gewässer, ma dohin zeréck, wou si selwer gebuer goufen.

Wouduerch ënnerscheede sech Mouke vu Fräschen?

Net eleng beim Kierperbau ginn et Ënnerscheeder tëscht de Mouken an de Fräschen. D’Mouken hu Waarzelen, aus deenen e Sekret kënnt, wann ee vun hire Feinde si wéilt friessen. Kënnt dëse Sekret widder d’Zong vum Friessfeind, schmaacht dat eekeleg an d’Mouke ginn nees erausgespaut.