Vertrieder vun EU-Staaten hunn dës Woch am Ruanda Gespréicher iwwer Expulsiounszentere gefouert. "D'Visitte gouf et wierklech an d'Verhandlunge lafen nach", confirméiert de ruandeschen Ausseminister Olivier Nduhungirehe der Noriichtenagence AFP, ouni weider Detailer oder den Zäitpunkt vun den Entrevuen ze nennen. D'lescht Woch haten de "Spiegel" an den ADR-Magazin "Report Mainz" iwwer d'Verhandlungen zu sougenannte Return Hubs bericht.
D'Rees géing deemno op e Grupp vu Staaten zréckgoen, déi sech selwer "d'Ëmsetzer" nennen. Nieft Däitschland gehéieren och Éisträich, Dänemark, Griicheland an Holland dozou.
De Grupp préift deemno, a wéi eng Länner baussent Europa Leit bruecht kënne ginn, där hir Asyldemanden an Europa refuséiert goufen. Bis Enn des Jores soll e Partner fonnt ginn. Och Italien hätt an de leschte Wochen Interessi un esou engem Ofkommes mat Ruanda bekannt ginn. D'Gespréicher sollen deemno op techneschem Niveau gefouert ginn.
Bis ewell goung et nëmmen iwwer sougenannt Return Hubs. An deenen Zentere kéinte Leit bruecht ginn, där hir Asyldemanden an Europa refuséiert goufen.
D'Vertrieder vum EU-Parlament a Memberstaaten hate sech Ufank Juni op en Accord gëeenegt, mat deem méi Expulsiounen aus der EU méiglech soll ginn. Den Accord erlaabt et Memberstaaten, Expulsiounszenteren an Drëttlänner ze bauen, déi baussent der EU leien.
Eng Spriecherin vun der Regierung am Ruanda hat scho virun e puer Deeg "éischt Gespréicher" mat europäesche Regierungen iwwer en net definéiert Migratiounsofkommes confirméiert. Et wier awer nach näischt decidéiert.
Am Gespréich ass ënnert anerem en Transitzenter zu Gashora eng 60 Kilometer vun der ruandescher Haaptstad Kigali ewech. Do goufen zanter 2019 Migranten, déi a Lybien gestrant waren, opgeholl, wärend hir Asyldemanden traitéiert goufen. Der Regierung no hätte vill Leit d'Struktur zanterhier verlooss.
Ruanda hat 2022 mat der deemoleger brittescher Regierung vum konservative Boris Johnson en Ofkommes doriwwer decidéiert, Migranten ouni Pabeieren opzehuelen, déi iwwer den Äermelkanal a Groussbritannien komm waren. D'Labour-Regierung vum Keir Starmer huet dëst awer 2024 annuléiert. Donieft war se och vum ieweschte Geriichtshaff a Groussbritannien als "illegal" klasséiert ginn.
