Nieft véier weidere Fluchhäfen huet och de gréisste Fluchhafe vum südostasiateschen Inselstaat, den internationale Fluchhafe Soekarno-Hatta bei Jakarta, en Dënschdeg nees opgemaach. De Chaos, deen duerch den Ausbroch vum Vulkan Anak Krakatau ausgeléist gouf, huet sech deemno rëm geluecht.
De Fluchhafe vu Jakarta huet op Instagram erkläert, datt ee wéinst "der aktueller vulkanescher Aktivitéit" nees opgemaach hätt. Virdru war d'Fermeture ëmmer nees verlängert ginn. D'Fluchgesellschafte stinn elo virun der logistescher Aufgab, all Passagéier a Fligeren ënnerzekréien an op hir Destinatiounen ze bréngen.
Zu de véier weidere Fluchhäfen, déi nees op sinn, gehéieren dem Verkéiersministère no de méi klengen Halim-Perdanakusuma-Fluchhafen, op deem souwuel zivil wéi och militäresch Fligere fléien, souwéi den Hussein-Sastranegara-Airport zu Bandung. E weidere klenge Fluchhafen op Sumatra huet de Betrib iwwerdeem e Méindeg de Moie schonn nees opgeholl gehat. Domat sinn nëmmen nach zwee vun den aacht Fluchhäfe weiderhin zou.
Am Ganzen haten aacht indoneesesch Fluchhäfen de Betrib gestoppt, nodeems de Vulkan Anak Krakatau, deen iwwer 150 Kilometer vu Jakarta ewech ass, ausgebrach war an eng Wollek aus Äschen a Lava ausgestouss hat. Ronn 3.000 Flich goufen annuléiert. E Méindeg souzen dem Verkéiersministère no méi wéi 340.000 Leit op de Fluchhäfe fest.
Eleng e Méindeg de Mëtteg goufe méi wéi 240 Inlands- an Auslandsverbindungen annuléiert oder hate Verspéidung, hat et vum Fluchhafe Soekarno-Hatta matgedeelt. Bal 30.000 Passagéier waren dovu betraff.
Indonesien läit um Pazifesche Feierréng, wou e puer tektonesch Placken openeen treffen. Doduerch kënnt et ëmmer nees zu Vulkanausbréch an Äerdbiewen.
