D'Fotografe Jaafar Ashtiyeh an John Wessels goufen eegenen Aussoen no fir d'éischt vun engem Quad aus beschoss. Dono hunn e puer Männer mat hire Schosswaffen op den Ashtiyeh ageschloen, dee mat Prellungen um Kapp an um Uerwerkierper an d'Spidol koum.
Déi zwee Journaliste wollten iwwer d'Gewalt vu Siidler géint palästinensesch Olivebaueren zu Akraba berichten, wéi d'Attack geschitt ass. Nieft dem 58 Joer alen Ashtiyeh gouf och ee Palästinenser duerch d'Schëss verwonnt. Dem Palästinensesche Rouden Hallefmound no gouf hien um Fouss getraff an och an d'Klinik bruecht. De Wessels gouf zwar net blesséiert, hie krut awer seng Kamera a säin Ekipement geklaut.
D'AFP huet doropshi bei der israeelescher Arméi Ermëttlungen zum Virfall gefuerdert. "Et ass inakzeptabel, datt Journaliste vun arméierte Siidler geschloen a beklaut kënne ginn - an dat virun den Ae vun israeelesche Sécherheetsleit", sot den AFP-Noriichtechef Phil Chetwynd. Dem Wessels no war d'Attack geschitt, obwuel ronn eng Dosen israeelesch Zaldoten op 500 Meter Distanz stoungen.
Am Westjordanland liewe méi wéi 500.000 israeelesch Siidler nieft ronn dräi Millioune Palästinenser. Déi israeelesch Siidlunge gëllen dem internationale Recht no als illegal. Zanter dem Ufank vum Gaza-Krich am Oktober 2023 huet och d'Gewalt am Westjordanland staark zougeholl. Am Ganze sinn enger AFP-Zielung no zanterhier méi wéi 1.000 Palästinenser duerch israeelesch Zaldoten oder Siidler ëm d'Liewe komm. Israel no koumen am selwechten Zäitraum op d'mannst 49 Israeelie bei palästinenseschen Attacken oder wärend israeelesche Militärasätz ëm.
