Wéinst engem Knuet an der Long gëtt de Poopst Leo XIV. en Dënschdeg am Nomëtteg operéiert. Hien ass an der Mëttesstonn am Gemelli-Spidol zu Roum ukomm a wäert no senger Operatioun wuel eng Woch hospitaliséiert bleiwen. Bei senger Arrivée huet hie gelaacht an de Leit gewonk, déi virun der Dier vun der Klinik op hie gewaart hunn.
Ënnert der Leedung vum Chirurg Stefano Margaritora wäert de Poopst vun enger Ekipp Dokteren operéiert ginn. D'Spidol am Nordweste vun der italieenescher Haaptstad ass zanter Laangem déi éischt Ulafstell fir Peepst. Fir dësen Zweck gëtt et um ieweschte Stack eng Suite, an där de Poopst a säin Team vun Dokteren ënnerbruecht sinn. Well dës Raimlechkeeten de Moment awer renovéiert ginn, muss op aner Zëmmeren ausgewach ginn.
E Sonndeg hat de Pontifex ugekënnegt, datt hien an den nächsten Deeg misst operéiert ginn. De Knuet wier fréi entdeckt ginn, mee d'Dokteren hätten him awer geroden, sech operéieren ze loossen. Kniet an der Long sinn an der Reegel harmlos. Ob dem Leo XIV. seng nächste Rees a Südamerika, déi fir Ufank November geplangt ass, dovu beanträchtegt wäert ginn, ass nach net gewosst.
