D'Asti stellt kloer, datt Hate-Speech keng Plaz an der politescher Ausernanersetzung dierft hunn.

An hirem eegenen Numm huet d'Asti-Präsidentin Laura Zuccoli, wéinst Diffamatioun an Opruff zum Haass, eng Plainte géint Onbekannt gemaach.

Hannergrond si Reaktioune vu Useren um Facebook-Kont vum ADR-Deputéierte Fred Keup, an deenen d'Laura Zuccoli, eegene Wierder no, Mëtt Februar beleidegt a rassistesch vernannt gëtt, bis hin zum Appell zu Mord oder Gewalt.

Dës User-Commentairen huet den Deputéierten ouni Commentaire oder Condamnatioun op sengem Site stoe gelooss.

Sourcë vun de Commentairë waren Aussoe vum Fred Keup iwwert de Contenu vun enger Carte Blanche vum Laura Zuccoli, déi am Februar op RTL diffuséiert gouf, wouranner et ëm d'schoulesch Diskriminatioun vu jonke Kapverdianer goung.

D'Asti stellt kloer, datt Hate-Speech keng Plaz an der politescher Ausernanersetzung dierft hunn.

Dat wat u Commentairen um Facebook-Kont vum ADR-Politiker Keup ze liese stoung, stellt fir d'Asti kloer e Fall vun Haass-Ried duer. Op d'Schäerfst ze verurteele wier et, datt och nach en Deputéierten den Ustëfter vun esou diffamatoreschen Aussoe gewiescht wier.

D'Asti denoncéiert duerfir dës Faiten an hofft drop, datt d'Parteien an der Chamber dëst och esou gesinn.

Äntwert op d'Asti-Uschëllegungen

D'ADR reagéiert en Dënschdeg den Owend an engem Schreiwes op Franséisch a reprochéiert der Asti, fir ëffentlech d'Recht op fräi Meenung z'attackéieren.

Deemno géif an den Ae vun der Partei den Deputéierten Keup derzou bruecht ginn, fir seng Meenung net méi kënnen ze soen.

D'ADR freet sech och, ob d'Asti d'Land net "haasst", dat dës Organisatioun esou generéis géif fidderen?!

Fir d'ADR bleift et duerfir och legitim, fir eng ONG ze kritiséieren, déi partiell vum Steierzueler bezuelt gëtt.

Andeems de Fred Keup insultéiert gëtt, géif d'Asti an den Ae vun der ADR, Kriticke mat Ophetze gläich setzen.

D'ADR bezeechent d'Asti als "Championne vun der Intoleranz", déi d'Integritéit vum Deputéierte Keup a Fro géif stellen, ouni Preuven ze hunn - Rieds geet vun enger Beleidegung (Outrage) vun engem Deputéierten, déi d'Organisatioun nach méi un de Bord vun der Gesellschaft géif stellen.