No 15 Specialle läit den Esapekka Lappi aus Finnland, mat sengem Bäifuerer Janne Ferm, un der Spëtzt. Den Zweetplacéierte vun e Freideg, den Takamoto Katsuta, huet wéinst technesche Problemer vill Zäit verluer an ass just nach 47. Neien Zweeten ass de Fransous Adrien Fourmaux mat 1:06 Réckstand op de Lappi. Den Elfyn Evans, deen e Freideg nach wäit hanne louch, huet sech no vir geschafft a läit virum leschten Dag op der drëtter Plaz (+ 1:23). Och dem Thierry Neuville säin Auto huet keng Problemer méi gemaach an de Belsch konnt sech vun der 11. op déi 4. Plaz no vir katapultéieren (+ 2:22). Den Drëttplacéierte vun e Freideg Oliver Solberg ass neie Fënneften.
Fir de Grégoire Munster ass et um drëtten Dag bis an déi 14. Speciale ganz gutt gelaf. De Lëtzebuerger, deen e Freideg nach op Plaz 20 louch, konnt sech bis op déi 14. Plaz no vir schaffen. Am leschten Duerchgang huet de Lëtzebuerger awer wéinst engem Incident immens vill Zäit verluer a läit virum leschten Dag op der 28. Plaz.
