E Freideg war bei der Rallye Dakar 2026 déi 12. Etapp, bei där et iwwer am Ganze 718 Kilometer vun Al Henakiyah op Yanbu gaangen ass. Gewonnen an domadder e grousse Schrëtt Richtung Schlussvictoire gemaach huet den Nasser Al-Attiyah, fir deen et déi 50. Dagesvictoire a senger Karriär war. Den Dacia-Pilot hat um Enn vun der Etapp en Ecart vun 1:04 Minutt op de Mitch Guthrie an 1:25 Minutt op den Toby Price. Am General kann den Al-Attiyah säi Virsprong op der Spëtzt op den Nani Roma ëm ronn eng véierel Stonn vergréisseren an ass virun der leschter Etapp e Samschdeg am Normalfall net méi anzehuelen.
De Charles Munster ass zesumme mat sengem Co-Pilot Xavier Panseri op eng gutt 51. Plaz komm. Am General steet de Lëtzebuerger op Plaz 121.
