A Frankräich, England a Spuenien war Paus am Championnat, mee et gouf an der Coupe gespillt.
Inter - Hellas Verona 2:1
1:0 Martinez (13'), 1:1 Henry (74'), 2:1 Frattesi (90+3')
De Favorit war gutt an de Match komm a louch an der Partie séier 1:0 vir. D’Gäscht hu sech net verstoppt a si besonnesch an der 2. Hallschent ëmmer méi staark ginn. Den 1:1-Ausgläich an der 74. Minutt war verdéngt. Wéi jidderee mat engem Remis gerechent huet, gouf et nach eng geckeg Schlussphas. An der 93. Minutt huet de Frattesi den 2:1 markéiert. Kuerz drop gouf de Lazovic, Spiller vun Hellas Verona, mat enger rouder Kaart vum Terrain gesat. Verona huet awer weider no vir gespillt a krut an der 9. Minutt vun der Nospillzäit nach en Eelefmeter zougesprach. Dem Henry hunn awer d’Nerve versot an hien huet just de Potto getraff. Um Enn gouf et e knappen Erfolleg fir Inter, deen och op der 1. Plaz an der Tabell bleift.
LINK: Den Iwwerbléck vun der Serie A
An der 3. Ronn an der englescher Coupe si gréisser Iwwerraschungen ausbliwwen. Newcastle huet ënner anerem 3:0 zu Sunderland gewonnen. D’Queens Park Rangers ware Bournemouth mat 2:3 ënnerleeën. Watford aus der 2. Liga huet sech knapp 2:1 géint Chesterfield aus der 5. Liga duerchgesat. Brighton huet Stoke City mat 4:2 geklappt. Chelsea huet géint Preston North End mat 4:0 d’Iwwerhand behalen an Aston Villa huet zu Middlesbrough mat 1:0 gewonnen.
Lille huet sech an 1/32-Finall a Frankräich héich mat 12:0 géint Golden Lions, eng Ekipp vun der Insel Martinique, behaapt. Brest huet knapp mat 1:0 géint Angers aus der Ligue 2 gewonnen. Bordeaux (Ligue 2) huet sech bei der Entente Sannois Saint-Gratien aus der National 2 laang schwéier gedoen, no Eelefmeterschéisse schlussendlech awer nach 5:3 gewonnen.
An der spuenescher Coupe hat Atlético Madrid Krämpes mat CD Lugo aus der 3. Divisioun. D’Ekipp vum Diego Simeone huet sech duerch eng besser Leeschtung an der 2. Hallschent awer mat 3:1 zu Lugo duerchgesat. Getafe huet 1:0 bei Espanyol Barcelona gewonnen. Elche huet doheem 0:2 géint Girona verluer.
