Den Dän Tobias Lund Andresen huet déi éischt Etapp vum Tour Down Under gewonnen. No 120 Kilometer ronderëm Tanunda setzt sech de Profi vun Decathlon am Sprint géint de Britt James Matthew Brennan vun Team Visma an den Australier Sam Welsford vun Ineos Grenadiers duerch. Den Andresen ass domat och neie Leader am General, eng Sekonn virum Ineos-Profi Samuel Watson.
An Australien sinn och zwee Lëtzebuerger um Depart. De Kevin Geniets fiert als 79. iwwert de Stréch, de Luc Wirtgen klasséiert sech als 129., allebéid an der selwechter Zäit wéi de Gewënner. Nom Prolog an der éischter Etapp steet de Geniets am General op der 75. Plaz mat engem Retard vun 20 Sekonnen, wärend de Wirtgen deen 98. ass mat 23 Sekonne Retard.
En Donneschdeg wäert déi zweet Etapp, erëm an der Géigend vun Adelaide, vun The Parade iwwer 148 koppeg Kilometer op Greenhill Road féieren.
