En Donneschdeg den Owend hat de Rotary Club Dikrech - Ettelbréck op Dikrech an d'Hotelschoul invitéiert. De Rotary Club mat de Schüler an de Proffen aus em EHTL an Zesummenaarbecht mam "Stärekach Antonio Pretti", de fréiere Kach aus dem Hotel Hiertz vu Dikrech hunn den Invitéen e fantastesche Menü presentéiert.

Ugaangen ass et mat engem flotte Concert vun dem Rolls Royce Chamber Orchestra. Duerno huet de President, den Dr. Schanen eng kleng Ried gehalen, wou et uschléissend un den Aperitif gaangen ass. D'Schüler aus der Hotelschoul hunn eis häerzlech mat enger Coupe, respektiv engem Cocktail empfaangen. Duerno goung et an de Restaurant a mat Stolz hunn d'Schüler eis hir Kreatioune presentéiert an zerwéiert, déi si an Zesummenaarbecht mam Antonio Pretti an no senge Rezepter nogekacht hunn. Déi extravagant Blummendekoratioun koum vun de Schüler aus der Akerbauschoul.

100 Leit hunn um Diner musical de bienfaisance deelgeholl, nom Diner konnt een d'Buch, wat den Erni Breuskin iwwer d'Geschicht vum Restaurant Helène Hiertz geschriwwen huet, kafen an den Antonio huet et och op Wonsch ënnerschreiwen. Ier et Heem goung, konnte mer nach eng "Grappa au miel et herbes" probéieren, déi den Antonio selwer brennt.

Alles an allem war et e flotten a gelongenen Owend, dee super organiséiert war an den Antonio huet selwer d' Wuert ergraff an de Leit e Merci gesot an de Schüler an hire Proffe gratuléiert fir hir gutt Aarbecht.

Fotoen an Text vum Ketty a Rom Hankes.