De Schrëftsteller an Illustrator Janosch ass dout. Hien ass en Dënschdeg am Alter vu 95 Joer op Teneriffa gestuerwen, sou säin Editeur Bernhard Feil zu Tübingen.
Mat Bicher wéi "Oh, wie schön ist Panama" huet de Kënschtler zanter den 1970er Jore Kanner an aller Welt begeeschtert. Op Lëtzebuergesch war d'Buch ënnert dem Titel "Oh, wéi ass Panama sou schéin" vum Georges Hausemer iwwersat ginn.
Seng Wierker sinn an iwwer 40 Sproochen erauskomm.
Säi groussen Duerchbroch hat de Janosch 1978 mat de Geschichten iwwer den Tiger an de Bär. Den däitschen Auteur huet iwwer 150 Bicher fir Kanner an och Erwuessener geschriwwen, an donieft och gezeechent.
