Eng gëlle Statu vum Donald Trump suergt am EU-Parlament fir Diskussiounen. Si ass 2,60 Meter héich a weist e plakegen Trump, deen op de Schëllere vun engem Mann sëtzt, dee bal ënnert dem Gewiicht zesummebrécht. Dobäi hält den US-President eng Wo an der enger, e Golfschléier an der anerer Hand. Entworf ginn ass d'Statu vum dänesche Kënschtler Jens Galschiöt an dréit den Titel "Orange Plague" (orange Pescht).
Schonn um Bord vun der Weltklimakonferenz a Brasilien an op der Münchener Sécherheetskonferenz war d'Konschtwierk ze bestaune gewiescht. Nëmme e puer Woche wäert d'Skulptur zu Stroossbuerg ze gesi sinn. Dem Galschiöt no soll se am November op der Weltklimakonferenz an der Tierkei ze gesi sinn.
Op de Gäng am Parlament géing d'Statu fir vill Gespréich suergen, heescht et vu Stroossbuerg. Kleng Kopien aus dem 3D-Printer, déi de Kënschtler zur Verfügung stellt, wieren e begierten Artikel. Si géing eng treffend Metapher duerstelle fir d'Verhältnis tëscht der EU an den USA.
