Déi schweedesch Akademie vun de Wësseschaften huet e Mëttwoch bekannt ginn, wien dëst Joer den Nobelpräis fir Chimie kritt. De Fransous Henri Kagan an de Japaner Kenso Soai gi fir d'Entdeckung vun net-linearen Effekter an der Autokatalys an hirer Fuerschung zu der "asymmetrescher organescher Synthees" ausgezeechent.
D'Erkenntnisser vum Kagan a Soai hätten ënnert anerem fir d'Pharmaindustrie eng wichteg Roll. Si hätte mat hirer Fuerschung e Rätsel geléist, dat et zanter "Joerzéngte" gouf. Konkreet geet et bei hire Fuerschungen ëm cheemesch Reaktioune bei sougenannte Spigelmoleküllen. D'Resultater vum Kagan an dem Soai wiere "vun enormer Bedeitung fir Chemiker, déi Reaktioune fir Uwendunge wéi der pharmazeutescher Produktioun entwéckelen", huet den Nobelkommitee erkläert.
Zejoert waren dräi Wësseschaftler aus Japan, Jordanien a Groussbritannien fir d'Entwécklung vu metallorganesche Gerüster mam Chimie-Nobelpräis ausgezeechent ginn.
E Méindeg ware schonn de Medezin-Nobelpräis an en Dënschdeg de Physik-Nobelpräis bekannt gi ginn. En Donneschdeg kënnt nach den Nobelpräis fir Literatur an e Freideg de Friddensnobelpräis. Den Ofschloss mécht dann d'Auszeechnung fir Wirtschaftswësseschfaten e Méindeg. Den Nobelpräis ass dëst Joer mat 12 Millioune schweedesche Krounen, also eng Millioun Euro, dotéiert. Iwwerreecht ginn d'Auszeechnungen den 10. Dezember, dem Doudesdag vum Alfred Nobel.
