Zu Ceuta, der Exklav, nieft Marokko an Nordafrika, ass d'Migrantiounskris nach net eriwwer. Zwar hunn déi allermeescht erwuesse Migranten de spueneschen Territoire nees verlooss, ma ëm 1.000 Mineuren sinn nach do. Si sinn duerch dat internationaalt Recht besser protegéiert a kënnen net einfach zeréckgeschéckt ginn. Der EU-Charta no muss Spuenien no hinne kucken.
Déi regional Autoritéiten bekloen awer, dass hir Kapazitéiten fir no de Jugendlechen ze kucken bei wäitem net duerginn. Vill géifen der einfach um Strand oder a Parken hausen. Eng 1.000 jonk Männer a Fraen wären um Pabeier erfaasst, Honnerten anerer wäre méiglecherweis ënnergedaucht a géife sech och nach zu Ceuta ophalen.
Hëllefsorganisatiounen hëllefen op der Plaz mat Waasser, Medikamenter an Decken.
E weidere Problem ass, wéi zum Beispill déi däitsch Tagesschau mellt, dass nëmmen en Drëttel vun de mannerjärege Migranten aus Marokko wären. Et sinn der och aus dem Sudan oder Syrien dobäi, wat d‘Heembréngen nach méi komplizéiert mécht.
