No sëllege schwéiere Blessurë vu Jugendleche bei Policeasätz wärend de Schülerprotester huet d'Regierung den Asaz vu Schockgranaten ausgesat. Dat gëllt virop nëmme fir d'Schülerprotester, "fir ze klären, wat genee geschitt ass", sot den Inneminister Laurent Nuñez e Mëttwoch dem franséischen RTL. E 15 Joer ale Jong aus Lens huet e Méindeg duerch esou eng Granat seng Hand verluer.
Net genee gewosst war virun allem, ob de Jong vun der Policegranat getraff gouf oder ob hie se selwer opgehuewen hat, fir se zréckzegeheien. Gekläert gi soll och, ob den Asaz de Reegelen entsprach huet. D'Generalinspektioun vun der Police huet Ermëttlungen opgeholl.
Am Ganzen ermëttelt d'Policeopsiicht schonn an 18 Fäll am Zesummenhang mat de Schülerprotester. Ënnert anerem huet ee 14 Joer ale Jong duerch eng Tréinegasgranat, déi aus kuerzer Distanz geschoss gouf, e groussen Deel vu sengen Zänn verluer an de Kifer gebrach.
De Polizist, deen d'Granat bei engem Asaz géint Schüler agesat hat, déi zu Saint-Ouen-l'Aumône demonstréiert hunn, ass wéinst illegaler Gewalt ugeklot. De Parquet geet dovun aus, datt d'Viraussetzunge fir Noutwier net erfëllt waren. Mënscherechtsgruppen, Oppositiounspolitiker a vill Schüler reprochéieren der Police an de leschten Deeg mat ze vill Gewalt virgaangen ze sinn.
Dem Inneministère no goufen en Dënschdeg 488 Leit festgeholl an 43 Sécherheetsleit blesséiert. Zanter dem Ufank vun de Protester goufen iwwer 6.500 Leit festgeholl, virun allem Mannerjäreger.
Lycéesschüler blockéieren zanter Mëtt September landeswäit den Accès zu honnerte Schoulen, fir fir besser Konditiounen ze demonstréieren. Konkreet fuerder si ënnert anerem méi Proffen, méi kleng Klassen, méi kuerz Schouldeeg an e besseren Ekipement vun de Schoulen. Gläichzäiteg sinn d'Schüler rosen iwwer Ongerechtegkeeten am Bildungssystem an e Manktem u Perspektiven.
