D’Boot mat eelef Mënschen u Bord ass bei staarkem Wellegang virun der Hafestad Labuan Bajo ënnergaangen, déi bei Touriste beléift ass, wéi déi staatlech Noriichtenagence Antara e Samschdeg matgedeelt huet. Siwe Mënschen - dorënner zwee spuenesch Touristen a véier Membere vun der Besatzung - wiere gerett ginn. No der spuenescher Famill gëtt e Samschdeg weider gesicht.
D’Hafenautoritéite vu Labuan Bajo hunn erkläert, d’Touristeboot wier bei stiermeschem Mier mat Welle vu bis zu dräi Meter Héicht ënnergaangen. Duerch déi héich Welle war och d’Sich- a Rettungsaktioun méi schwéier, esou de Chef vun der Hafeverwaltung Stephanus Risdiyanto der Noriichtenagence Antara géigeniwwer.
An engem Video, dee vum nationale Rettungsdéngscht verëffentlecht gi war, war ze gesinn, wéi Secouristen a bloen Uniforme Mënschen - e puer vun hinne buerféiss - aus engem Schlauchboot eraus u Land gehollef hunn. Op anere Biller ware Leit a Rettungswesten an engem Rettungsboot ze gesinn.
Schëffsaccidenter geschéie virun der Küst vun Indonesien mat senge 17.000 Inselen ëmmer nees. Ursaach dofir sinn dacks large Sécherheetsmesüren.
