Um Mëttwoch stoung zu Bartreng de Spëtzematch tëschent der Sparta an der Arantia Fiels um Programm. D’Gäscht hu missen op ee Profispiller verzichten an awer war de Match ausgeglach bis zum Schluss.
De Fielser Amerikaner Michael Anthony Carter huet kuerz viru Schluss en Dräier getraff a seng Ekipp 85:82 a Féierung bruecht, et sollt den Endstand vum Match bleiwen. Hie koum insgesamt op 23 Punkten. Et war déi éischt Defaite fir Bartreng des Saison.
D’Residence Walfer wënnt e Krimi mat 79:77 géint d’Musel Pikes. D’Gäscht haten a Persoun vum Sam Streef eng Méiglechkeet, de Match mat engem leschte Worf ze gewannen, den Dräier ass allerdéngs dolaanscht gaangen.
De Basket Esch iwwerrennt de Stater Racing mat 97:64 a weist domat eng Reaktioun op déi schwaach Leeschtung vum leschte Weekend géint Steesel. 31 Punkte goungen op de Kont vum Clancy Rugg.
Den T71 Diddeleng setzt sech auswäerts beim Tabelleleschte Conter däitlech mat 92:76 duerch. Conter hat d’Partie gutt ugefaangen a louch 7:0 a Féierung, hat duerno allerdéngs näischt méi entgéint ze setzen. Den Jimmie Lee Taylor koum op 20 Punkte fir d’Gäscht.
Um Dënschdeg konnt sech d’Amicale Steesel auswäerts mat 101:92 géint d’Kordall Steelers duerchsetzen. Den Ahston Sherrel koum op 27 Punkten. Um Donneschdeg spillt nach d’Etzella Ettelbréck géint Mambra Mamer, duerno geet et an eng kuerz Wanterpaus.
Bei den Damme stoung de kompletten 11. Spilldag um Mëttwoch um Programm. Den T71 Diddeleng bleift weider ongeschloen a setzt sech an eegener Hal mat 82:58 géint de Basket Esch duerch. Fënnef Spillerinne vun Diddeleng hunn zweestelleg gescored an esou huet d’Lokalekipp des Partie kloer dominéiert.
D’Sparta Bartreng setzt sech och däitlech mat 113:65 géint Wolz duerch. Mat 41 Punkte konnt d’Nicole Torresani iwwerzeegen, Bartreng huet an all Véierel mindestens 27 Punkte geworf.
En enke Match huet d’Amicale Steesel mat 68:61 géint d’Musel Pikes fir sech entscheet. 25 Punkte goungen op de Kont vum Desiree Ramos.
