Um 6. Spilldag vun der Bundesliga huet Borussia Dortmund beim 0:0 géint Union Berlin op en Neits zwee Punkte leie gelooss. Déi éischt Hallschent gouf vu béiden Ekippen intensiv geféiert, war awer aarm u Golchancen. Déi bescht Aktioun konnt den Dortmunder Golkipp kuerz virun der Paus staark paréieren. De BVB huet am zweeten Duerchgang méi versicht, koum awer net duerch. D'Tabelleféierung kéint just vu kuerzer Dauer sinn, wa Bayern München den Owend géint Leipzig gewanne sollt.
Am Saarland kruten d'Spectateuren eppes fir hir Sue gebueden. Um Enn goung Elversberg mat 4:3 géint Augsburg als Gewënner vum Terrain. Augsburg verpasst et domat, de Punktgewënn vu leschter Woch géint Bayern München ze vergolden.
D'Saarlänner krute schonn no 4 Minutten en Eelefmeter zougesprach, deen den Augsburger Golkipp fir d'éischt hale konnt, de Pektov huet am Nosetzen awer markéiert. Dräi Minutte méi spéit huet Elversberg erhéicht an no enger hallwer Stonn nach eng Kéier nogeluecht. An enger laanger Nospillzäit krut och Augsburg en Eelefmeter a konnt virun der Paus op 1:3 verkierzen. Och nom Säitewiessel si béid Ekippen dacks virum géigneresche Gol opgedaucht. D'Gäscht konnten no 75 Minutten op 2:3 verkierzen an de Match war nees lancéiert. An de leschte Minutte sinn nach eng Kéier zwee Goler gefall, mam besseren Ausgang fir Elversberg.
Werder Bremen huet sech no engem 0:2 an der Paus zeréckgekämpft a Paderborn beim 2:2 nach ee Punkt ofgeholl. Man of the Match war eemol méi den Niklas Füllkrug, deen zweemol fir Bremen markéiert huet. Werder bleift domat am véierte Match hannerteneen ongeschloen.
Mat engem Hummer aus der Distanz huet de Miro Muheim de Match entscheet an Hamburg géint Stuttgart dräi Punkte geséchert. De Gol an der 88. Minutt zum 1:0 huet Stuttgart äiskal erwëscht, dat eigentlech de ganze Match iwwer déi besser Ekipp war. D'Gäscht hunn awer hir Chancen net genotzt a sti weiderhin am ënneschten Drëttel vun der Tabell.
Mainz huet de Match géint harmlos Schalker verdéngt gewonnen (1:0) a bleift an der Tabell um Spëtzentrio München, Dortmund a Freiburg drun. Den decisive Gol war dobäi schonn an der 24. Minutt gefall.
E Freideg den Owend huet Frankfurt no der héijer Néierlag géint Leipzig um viregte Spilldag eng besser Leeschtung gewisen. D'Eintracht huet sech mat 1:0 géint Köln behaapt, dat sech haaptsächlech op d'Verteidegung fokusséiert hat.
An der Owespartie treffe Bayern München an RB Leipzig openeen. Dobäi trëfft de Martin Demichelis, deen zënter Juli op der Leipziger Trainerbänk sëtzt, op säi fréiere Veräin, mat deem hien eng Rëtsch Trophéeë gewonnen huet.
Wéi d'Matcher am internationale Futtball ausgoungen, fannt Dir hei.
Klickt hei, fir op d'Säit mat all de Resultater ze kommen.
Klickt op de Match, fir d'Statistiken ze gesinn.
