Den Alexander Davies huet bei der U21-WM an der Kategorie +84kg Sëlwer gewonnen. An der Finall e Sonndeg am polnesche Bielsko-Biala huet sech de Lëtzebuerger Karateka misse géint den Ivan Kudzinau aus Belarus trotz enger 1:0-Féierung nach mat 1:7 geschloe ginn.
Um Wee an d'Finall war den Alexander Davies, dee schonn als U21-Europameeschter ugereest war, immens staark ënnerwee. No de Victoirë géint den Zypriot Charalampos Themistokleous (7:1), de Georgier Nikoloz Gigauri (3:0) an de Bosnier Harun Smajic (7:4) gouf et och an der 1/2-Finall eng souverän 3:0-Victoire géint de Fransous Adam Tadjer.
