Déi global Erwiermung goung dat lescht Joer weider: Wéi den EU-Äerdiwwerwaachungsprogramm Copernicus mellt, war 2025 deemno dat drëttwäermst Joer zanter dem Ufank vun den Opzeechnungen a bal esou waarm wéi déi zwee Rekordjoren 2024 an 2023. Eng éischte Kéier louch déi global Duerchschnëttstemperatur vun den dräi viregte Joren iwwer 1,5 Grad iwwer dem virindustriellen Niveau, wéi et am Klima-Joresrapport vu Copernicus e Mëttwoch heescht.
2025 louch déi duerchschnëttlech Lofttemperatur op der Äerd deemno 1,47 Grad iwwer dem virindustriellen Niveau. Dëst war bal esou vill wéi am global zweetwäermste Joer 2023 mat 1,48 Grad iwwer dem virindustriellen Niveau a kënnt un d’Rekordjoer 2024 erun, wéi de virindustriellen Niveau ëm 1,60 Grad iwwerschratt gi war.
Datt déi global Duerchschnëttstemperatur an de leschten dräi Joren zesummegeholl iwwer 1,5 Grad iwwer dem virindustriellen Niveau läit, géing net bedeiten, datt d’Weltcommunautéit schonn d’Zil vum Paräisser Klimaofkommes erreecht huet. D’Ofkommes vun 2015 gesäit vir, d’Äerderwiermung méiglechst op 1,5 Grad am Verglach zu der virindustrieller Zäit ze limitéieren. Fir e Scheitere vum Zil misst de Grenzwäert iwwer e puer Joer ewech iwwerschratt ginn.
De rezentste Copernicus-Rapport stëtzt allerdéngs d’Aschätzung vu ville Fuerscher a politeschen Acteuren an de leschte Méint, datt déi 1,5-Grad-Grenz net méi anzehalen ass an d’Mënschheet sech dowéinst op e Klimawandel mat uerge Konsequenzen astelle muss. Mat Bléck op déi aktuell Äerderwiermung wier mat enger dauerhafter Iwwerschreidung vun der 1,5-Grad-Grenz schonn Enn vum Joerzéngt ze rechnen, heescht et weider am Rapport. Dëst wier “ee Joerzéngt éischter” wéi erwaart.
Den Direkter vu Copernicus, de Carlo Buontempo, erkläert, d’Welt wier “verdammt”, déi 1,5-Grad-Grenz z’iwwerschreiden a misst sech elo dorëm këmmeren, “wéi een déi een déi onvermeidbar Iwwerschreidung an hir Konsequenzen op d’Gesellschaften” an Ekosystemer am beschten an de Grëff kréich.
D’Äerderwiermung ass besonnesch op déi massiv Notzung vu fossillen Energië wéi Pëtrol a Kuel zréckzeféieren. Trotz de globalen Auswierkunge vum Klimawandel zum Beispill a Form vu méi Wiederextreemer wéi Stierm, Iwwerschwemmungen an Dréchenten hunn d’USA, den zweetgréisste Produzent vu Zäregasemissiounen op der Welt, d’Paräisser Ofkommes gekënnegt. Déi lescht Woch huet den US-President iwwerdeem annoncéiert, datt d’USA sech och aus der Klimakaderkonventioun vun de Vereenten Natiounen zréckzéie wäerten.
Déi lescht eelef Joer ware Copernicus no déi wäermst zanter dem Ufank vun den Opzeechnungen. Wärend 2024 den natierleche Klimaphenomeen El Niño zu der Rekord-Duerchschnëttstemperatur bäigedroen huet, huet 2025 de Klimaphenomeen La Niña gewierkt, deen normalerweis niddereg Temperature mat sech bréngt. Trotzdeem waren d’Temperaturen an de Polarregiounen zejoert besonnesch héich. An der Antarktis gouf e Rekord vun der Joresduerchschnëttstemperatur erreecht.
Fir 2026 huet d’Copernicus-Expertin Samantha Burgess keng Entwarnung ginn. Si erwaart, datt dëst Joer zu de fënnef wäermste Joren op der Äerd iwwerhaapt gehéiere wäert - “vläicht vergläichbar mat 2025".
