Temperaturen ënnert dem Gefréierpunkt a vill Schnéi hunn och e Mëttwoch a Frankräich en Impakt op den Trafic. Moies sinn op de Paräisser Fluchhäfe Roissy-Charles de Gaulle (CDG) an Orly ronn 140 Flich ausgefall, well d’Start- a Landebunnen als éischt hu misse fräigemaach an entäist ginn.
Zu Paräis si keng Busser gefuer an d’Societéit RATP, déi fir den ëffentlechen Transport an der Haaptstad responsabel ass, huet d’Leit dozou opgeruff, wa méiglech, am Homeoffice ze schaffen. Trotz dësem Appell ass et wärend dem Beruffstrafic an a ronderëm Paräis zu Staue vun am Ganzen eppes iwwer 600 Kilometer komm.
An de soziale Medien hunn iwwerdeems vill Fotoe vu Paräisser Monumenter ënnert dem Schnéi d’Ronn gemaach, en Ubléck, deen an de leschte Joren éischter seele war.
An 38 Departementer gouf en Dënschdeg iwwerdeems déi zweethéchste Wieder-Warnstuf declenchéiert. Dem franséische Wiederdéngscht no sinn am Norden an am Weste vum Land tëschent dräi a siwen Zentimeter Schnéi gefall, an den Ardenne waren et der esouguer bis zu 15. Schonn en Dënschdeg sinn am Departement Charente-Maritime a Westfrankräich op eenzele Plaze ronn 30 Zentimeter Schnéi gefall, aussergewéinlech vill, fir dës Regioun. Stand e Mëttwochnomëtteg gëllt nach an 12 Departementer eng Alerte orange.
De Schnéi huet uechter den Hexagon bannent de leschten Deeg dann och fir eng Partie Accidenter am Trafic gesuergt. Fënnef Persoune si bei dësen ëm d’Liewe komm.
