De Mann, deen der Police um Frankfurter Flughafen e Méindeg an d’Netz gaangen ass, war mat engem internationalen Haftbefeel gesicht. Duerch falsch Rechnunge soll hien un 1,2 Millioune komm sinn. Um Flughafe gouf hie festgeholl a koum duerno an d’Ausliwwerungshaft.
Dem Mann gëtt virgeworf, fiktiv Firme gegrënnt ze hunn a Rechnunge fir Reklamm-Servicer ausgestallt ze hunn, déi hien ni erbruecht hätt. Zu den Affer gehéiere kleng Betriber, Kierchen a medezinesch Servicer, déi de Mann ënnert anerem duerch permanent Uriff ënner Drock gesat soll hunn, d’Suen trotzdeem ze iwwerweisen.
Méi wéi dräi Joer hat Interpol nom Mann gesicht. E Méindeg hunn d’Beamten hien dunn op enger Rees vu Montreal a Kanada op Sofia a Bulgarien gestoppt. Bis zu 25 Joer Prisong kéinten him an den USA bléien, esou d’Bundespolice zu Frankfurt.
