Dräi Deeg no de massive Gewaltausbréch a Frankräich ass den Inneminister Laurent Nuñez mam Virworf konfrontéiert, den Inlandsgeheimdéngscht manipuléiert ze hunn. Dat investigatiivt Noriichteportal "Mediapart" huet geschriwwen, datt den Inneministère den Inlandsgeheimdéngscht soll ugewisen hunn, déi lénkspopulistesch Partei LFI fir d'Onroue responsabel ze maachen. De Ministère huet d'Reprochen en Dënschdeg zréckgewisen. Déi franséisch Deputéiert wëlle wärenddeem en Enquêtë-Comité zu de Gewaltausbréch saiséieren.
"Mediapart" huet am Bericht en net genannte Mataarbechter vum Inlandsgeheimdéngscht zitéiert, dee sech doriwwer beschwéiert huet, "datt een ons ausdrécklech opfuerdert, ze schreiwen, datt d'LFI hannert der Beweegung stécht, obwuel dat no allgemenger Opfaassung vum Geheimdéngscht objektiv falsch ass." Den Inneministère huet op Nofro vun der AFP erkläert, keng sou Uweisunge ginn ze hunn.
Den LFI-Coordinateur Manuel Bompard huet der Regiergung reprochéiert, "d'Aarbecht vum Geheimdéngscht ze manipuléieren, fir den LFI ze attackéieren". Dat wier e "Staatsskandal". Hien huet annoncéiert, de fir Regierungsmemberen zoustännege Strofgeriichtshaff unzeruffen.
An deene leschten Deeg haten eng Rei Regierungsvertrieder ëffentlech d'Partei La France Insoumise (LFI) oder allgemeng Lénksradikaler fir d'Ausschreidunge matresponsabel gemaach. De franséische President Emmanuel Macron hat an enger Tëleesusprooch e Sonndeg "Randaléierer aus lénksextreeme Gruppéierungen" d'Schold ginn, deene sech "vill Krimineller ugeschloss" hätten.
