Den US-President Donald Trump huet den Drock op den Iran erhéicht an d’Verleeë vun enger “riseger Flott” an d’Golfregioun ugekënnegt. Vill Schëffer wieren ënnerwee, just fir de Fall, sou den Trump u Bord vun der Air Force One. Him wier léiwer, et géing näischt passéieren, mee si géifen d’Iraner genee observéieren, mat Bléck op de Regimm an deem säi brutaalt Virgoe géint d’Demonstranten.
Amerikanesch Medien hate gemellt, dass de Porte-avion USS Abraham Lincoln vu senge Manöveren am südchineesesche Mier an den Noen Oste geruff gi wier. Den US-President huet d’Preparatioune confirméiert. Vläicht misste si hir Armada awer och guer net asetzen.
Virdrun hat de Kommandeur vun den iranesche Revolutiounsgarden d’USA an Israel viru falsche Kalkulatiounen a schwéiere Konsequenze fir hir Länner gewarnt. Si hätten de Fanger um Ofzuch, sou de Generol Mohammed Pakpur. Israel an d’USA sollte keng falsch Schlëss zéien aus den “historeschen Erfarungen” an aus dem 12 Deeg laange Krich leschte Juni. En anere Generol huet gewarnt, dass am Fall vun engem Ugrëff op hiert Land, amerikanesch Basen an aner Zentere mat Afloss “legitim Ziler” wieren.
