Dem Tesla-Grënner Elon Musk seng Entreprise SpaceX wollt e Mëttwoch Raumfaart-Geschicht schreiwen. Eng Falcon-9-Rakéit sollt um 16.33 Auer Lokalzäit vum Kennedy Space Center op Cape Canaveral bei d’international Raumstatioun ISS starten.
U Bord vun der Dragon-Kapsel waren déi 2 experimentéiert US-Astronauten Robert Behnken an Douglas Hurley.
Aus dem Start ass e Mëttwoch awer näischt ginn, well d’Wieder net matgespillt huet. Et goufen Donnerwiederen iwwer Cape Canaveral. Den nächste Versuch ass fir e Samschdeg ugesat.
Wann d’Missioun “Demo-2" e Succès gëtt, kéint déi amerikanesch Weltraumagence Nasa an Zukunft op SpaceX-Rakéiten zeréckgräifen. A wier esou méi onofhängeg vun de russeschen Sojus-Rakéiten, déi an de leschte Jore benotzt goufen.
