Iwwer 70 Ziler am Zentrum vu Syrien wiere mat Kampffligeren, Helikopteren an Artillerie attackéiert ginn, dat erkläert d’US-Regionalkommando Centcom. Den US-President Donald Trump huet op senger Online-Plattform “Truth Social” geschriwwen, dass wéi annoncéiert “ganz uerg Revanche-Mesuren” géint déi responsabel “mäerderesch Terroriste” géife geholl ginn. Déijéineg, déi US-Bierger attackéiere géifen, géifen “méi haart wéi bis ewell” getraff ginn, heescht et weider.
De Chef vum Pentagon Pete Hegseth huet erkläert, dass et d’Zil vum Militärasaz wier, Waffelager, Infrastrukturen a Kämpfer vum IS z’eliminéieren. Aus Sécherheetskreeser a Syrien heescht et, dass d’Attacken an der Wüst direkt bei der Stad Homs an a ländleche Gebidder bei Rakka an Deir es-Sor ausgefouert goufen.
De syreschen Ausseministère huet sech nach net direkt zu den Attacken e Freideg geäussert, huet allerdéngs op X erkläert, dass d’Land decidéiert wier, den IS. ze bekämpfen a “sécherzestellen, dass den IS keng sécher Flucht-Plazen op syreschem Territoire huet”. D’Land géif dann och iwwerall do, wou den IS eng Menace duerstellt, d’Militärasätz intensivéieren.
D’Lescht Woch e Samschdeg waren Centcom no zwee Zaldoten vun den USA an en Iwwersetzer bei enger Attack vun engem presuméierten IS-Member bei Palmyra ëmbruecht ginn. Et war den éischte Virfall vun dëser Zort, zënter deem de laangjärege President Baschar al-Assad vun der islamistescher HTS-Miliz a sengen Alliéierte am Dezember zejoert gestierzt gouf. Et war och den éischte Virfall zënter deem déi diplomatesch Bezéiungen tëscht Syrien an den USA nees opgeholl goufen.
