De Virfall huet e Sonndeg och fir e Verkéierschaos ronderëm ee vun de wichtegsten europäesche Fluchhäfe gesuergt.
Zeienaussoen no an opgrond vun de Biller vun Iwwerwaachungskameraen hätte véier Männer am Lift vun engem Parkhaus vum Fluchhafen enger Fra d’Waliss geklaut an dobäi Pefferspray agesat, sou de Spriecher vun der Police Peter Stevens. Duerch de Spray wieren 21 Leit blesséiert ginn, dorënner ee Kand vun dräi Joer. E Mann vun 31 Joer gouf wéinst dem Verdacht op Kierperverletzung festgeholl.
D’Persounen, déi um Virfall bedeelegt gewiescht wieren, hätte sech wéi et schéngt kannt, sou de Stevens. De geneeën Hannergrond wier nach onkloer, et géing sech wuel ëm en “isoléierte Virfall” handelen. D’Rettungsekippen hu sech op der Plaz ëm déi Blesséiert gekëmmert. Fënnef Persoune hu missen an d’Klinik transportéiert ginn.
De Virfall an den domat verbonnen Asaz vun der Police an de Rettungsekippen huet zu engem Verkéierschaos ronderëm de Fluchhafe gesuergt.
