Ganz vill Mënsche ginn nach vermësst. 7 vun den 8 Héichhaiser vum Komplex stoungen oder stinn momentan nach a Flamen.
51 Mënsche sinn nach op der Plaz ëm d’Liewe komm, wärend véier weider Persounen am Spidol gestuerwe sinn, hunn déi chineesesch Pompjeeën um Donneschdeg matgedeelt. A véier Héichhaiser sinn d’Bränn geläscht ginn an an dräi weidere Gebaier ënner Kontroll bruecht ginn. Eent vun den aacht Gebaier vum Wunn-Komplex ass verschount bliwwen.
Honnerte Leit ginn de chineesesche Rettungsekippen no en Donneschdeg ëmmer nach vermësst. E Mëttwoch war am nërdleche Staddeel “Tai Po” vun der chineesescher Verwaltungszon Hongkong de Brand ausgebrach, dee sech iwwer Steeën aus Bambus ausgebreet huet. Dobäi ass d’Feier extrem séier op e puer Héichhaiser iwwergaangen.
D’Autoritéiten hunn dann och eng Enquête op alle méi grousse Chantieren an der Metropol ordonéiert: “D’Regierung huet direkt Inspektiounen an alle Wunnsiidlunge vun der Stad ugeluecht, an deenen et méi grouss Reparaturaarbechten gëtt, fir d’Sécherheet vu Steeën a Baumaterialien z’iwwerpréiwen”, huet de Regierungschef vun der chineesescher Sonderverwaltungszon, John Lee, um Donneschdeg am Online-Déngscht Facebook erkläert.
