Nieft den zwee US-Zaldoten an engem Iwwersetzer, déi bei enger presuméierter Attack vum IS ëmbruecht goufen, goufen dräi weider amerikanesch Zaldote beim Ugrëff op eng gemeinsam Patrull vu syreschen an US-Zaldote blesséiert. Dat deelt den US-Regionalkommando Centcom mat. “Mir traueren ëm de Verloscht vun dräi groussen amerikanesche Patrioten a Syrien”, huet den US-President Donald Trump erkläert a mat Revanche gedreet.
De Pentagon-Spriecher Sean Parnell sot, d’Attack wier wärend engem Asaz fir d’Ënnerstëtzung vun Anti-Terror-Mesuren zu Palmyra geschitt. Déi syresch Stad läit an der Géigend vun anticken Ausgruewunge mat griichesch-réimesche Ruinen, déi zum Unesco-Weltkulturierwe gehéieren, a war viru ronn zéng Joer zäitweis vum IS besat.
Déi déidlech Attack wier en “Hannerhalt vun engem eenzelen IS-Schütze” gewiescht, heescht et vu Centcom op X.
Op senger Plattform Truth Social huet den Donald Trump geschriwwen, datt et eng “IS-Attack géint d’USA a Syrien an engem immens geféierleche Gebitt vu Syrien” ginn hätt, dat net vun der syrescher Iwwergangsregierung kontrolléiert géing ginn. Dräi weidere blesséierten US-Zaldote “géing et gutt” goen.
