De Regierungsrot dëse Méindeg kéint ee vun de leschte vun den LSAP-Ministeren Dan Kersch a Romain Schneider gewiescht sinn.

Et dierft elo relativ séier goen, d'RTL-Informatioun iwwer en imminente personelle Remaniement bei der LSAP huet sech confirméiert.

Schonn en Dënschdeg ass e Comité directeur vun der LSAP beieneen an dono wäert op enger Pressekonferenz bekannt gemaach ginn, datt de Vizepremier, Aarbechts- a Sportminister Dan Kersch sou wéi de Landwirtschafts- a Sozialminister Romain Schneider aus der Regierung demissionéieren.

An déi Regierung noréckele kéinten de Georges Engel an de Claude Haagen.

RTL-Informatiounen no wiesselt den Dan Kersch als Deputéierten an d'Chamber an de Romain Schneider geet an d'politesch Pensioun.

Neie Vizepremier soll iwwerdeems d'Gesondheetsministesch Paulette Lenert ginn.

Op der LSAP-Nordlëscht kéinte potentiell de Carlo Weber, Amir Vesali oder Bob Steichen an d’Chamber noréckelen.

Weider Detailer dierften en Dënschdeg bekannt ginn. Um 13.30 Auer ass eng Pressekonferenz vun der LSAP, déi iwwregens live op RTL.lu iwwerdroe gëtt.