D'Diskussioun ronderëm den Zoustand vun den Steegen am Mëllerdall zitt seng Kreesser. Den Tourismusverband vun der Regioun huet elo Stellung geholl.

Kritiséiert gëtt, datt d'Steegen aus Holz zwar schéin unzekucke sinn, ma iwwer laang Dauer eben och ee gewëssen Entretien brauchen. Plazeweis ass d'Holz awer morsch oder einfach ofgebrach.

Holzbrieder, déi reparéiert an ersat goufen, wieren deels duerno einfach esou - mat den Neel nach dran - an de Bësch geheit ginn, heescht et. "Sollt do d'Forstverwaltung net mam gudde Beispill virgoen?", freet sech ee Lieser, dee sech zum Thema bei RTL an der Redaktioun gemellt huet.

Tourismusverband reagéiert

En Donneschdeg huet den Tourismusverband vun der Regioun Mëllerdall an engem Schreiwes op déi "aktuell Diskussioune ronderëm den Holzsteeg an de Gemenge Konsdref a Waldbëlleg" reagéiert.

Et wier d'Uleies vum Tourismusverband, de Steeg, deen Deel vum Mëllerdall Trail ass an Accès zum Geotop Kallektuffquell gëtt, a Stand ze halen an opzewäerten. Et hätt een déi rezent Kriticken héieren, an dofir elo "relevant Partner an Interessegruppen" un en Dësch gebieden, fir Léisungen ze fannen.

Den Tourismusverband koordinéiert d'Gespréicher, bei deenen déi betraffe Gemenge Konsdref a Waldbëlleg, d'Syndicats d'Initiative et de Tourisme (SIT), d'Natur- a Forstverwaltung (ANF), d'Generaldirektioun Tourismus am Wirtschaftsministère an den Natur- a Geopark Mëllerdall (NGPM) zesummekommen.

"Fir fir den Erhalt vum Steeg eng dauerhaft Léisung ze fannen, déi de Bedürfnisser vum de Gäscht a vun der Regioun gerecht gëtt, gouf eng Etüd an Optrag ginn", heescht et iwwerdeems nach am Schreiwes vun der Tourismusverwaltung Mëllerdall. An engem nächsten Treffe soll elo iwwer weider Schrëtt a méiglech Optioune berode ginn.