Hie gouf duerch seng Geriichstsendung "Caught in Providence" weltberüümt an ass domat reegelméisseg viral gaangen.

Elo ass den als guttmiddeg bekannte Riichter am Alter vun 88 Joer un de Suitte vu Bauchspeicheldrüsekriibs gestuerwen. Dat huet seng Famill iwwert säin Instagram-Account wësse gedoen. Hie wier "no engem laangen a couragéise Kampf friddlech" entschlof, seng Häerzlechkeet, säin Humor a seng Frëndlechkeet hätt bei jidderengem, deen hie kannt hunn, "en onausläschlecht Zeechen" hannerlooss.

A senger Heemechtsstad Providence, am US-Bundesstaat Rhode Island, war hien zanter den 80er Joren als Riichter aktiv. De Frank Caprio gouf haaptsächlech awer duerch seng Emissioun  "Caught in Providence" zur weltwäiter Berüümtheet an zu enger richteger TV-Ikon. An der Emissioun goufe reell Geriichtsprozesser wéinst méi klenge Verstéiss wéi zum Beispill Verkéiersdelikter gewisen. De Caprio huet dëst als Bün genotzt, fir ze weisen, dass Mënschlechkeet an Empathie am Mëttelpunkt stinn an esou waren och seng Urteeler. Seng humorvoll a waarmhäerzeg Manéier am Geriichtssall wäerte ville Leit an Erënnerung bleiwen.

De Frank Caprio war 60 Joer laang mat senger Fra Joyce bestuet, mat där hie 5 Kanner, 7 Enkelen an 2 Urenkelen huet. Am Dezember 2023 war Bauchspeicheldrüsekriibs bei him festgestallt ginn, wéinst där hie sech mat Hëllef vun enger Chemotherapie behandele gelooss huet. Nëmme Stonne viru sengem Doud hat de Caprio sech nach perséinlech aus dem Spidol gemellt, mat de Wierder, hien hätt e Réckfall an et sollt ee fir hie bieden.