Fënnef Internetsäite fir pornografesche Contenu, déi am August eng Ruge vun der Arcom kruten, hunn elo Moossname fir d’Verifikatioun vum Alter vun hire Benotzer ëmgesat, esou steet et an engem Communiqué, deen e Donneschdeg vum franséische Regulateur fir audiovisuell an digital Kommunikatioun verëffentlecht gouf.
Wéinst dësem Schratt vun den Ubidder huet d’Arcom decidéiert, “keng Prozedur fir d’Blockéiere vun dëse Säite respektiv se aus de Sichmaschinnen erauszehuelen” anzeleeden, heescht et vun der onofhängeger Autoritéit.
D’Arcom huet och decidéiert, eng sechst Säit net z’ermanen, nodeems dës hire System fir d’Altersverifikatioun reaktivéiert huet. “D’Arcom ass frou ze gesinn, datt déi um Maart existéierend Instrumenter fir d’Verifikatioun vum Alter vun de pornographesche Säite kënne genotzt ginn”.
De Conseil d’État huet nämlech Mëtt Juli e ministerielle Reglement ugepasst, dat d’Verifikatioun vum Alter vun de Benotzer op dëse Säite verlaangt, nodeems eng Suspensioun vum Verwaltungsgeriicht vu Paräis am Juni annuléiert gouf.
Dës Verflichtung ass elo zum Objet vun engem onënnerbrachene Ping-Pong-Match tëscht verschiddene Plattformen an der franséischer Regierung ginn.
Zënter dem Gesetz vu 2024 an der Publikatioun vun engem Referenzdokument vun der Arcom iwwer d’Methoden, fir den Alter ze kontrolléieren, refuséieren e puer Entreprisen, dorënner de Besëtzer vu Youporn, Pornhub a Redtube Aylo, dës Moossnamen ëmzesetzen, mat der Begrënnung vu Sécherheetsbedenke fir d’User.
De Krittäre vun der Arcom no mussen d’Editeure vu pornographesche Säiten zum Beispill eng Foto oder en Identitéitsdokument froen, mat op d’mannst enger Method, déi de Prinzip vum duebelen Anonymat respektéiert. Esou soll ee beweisen, datt ee volljäreg ass, ouni awer seng Identitéit mussen ze verroden.
D’Arcom huet e Donneschdeg betount, datt si d’Konformitéit vun de Systemer fir d’Verifikatioun vum Alter op dëse Säite bewäerte géif. Am Fall vun engem “Verstouss” kéinte Sanktioune ausgeschwat ginn.
