D'WorldSkills, dat ass déi weltgréisste Competitioun an där jonk Leit an hire respektive Beruffsfelder géinteneen untrieden. Praktesch d'Weltmeeschterschaft vun de Beruffer. Hei konnt all eenzelen Participant wärend véier intensive Competitiounsdeeg seng Fäegkeeten ënner Beweis stellen. Ronn 1.400 jonk Professioneller aus 65 Länner hunn a 64 verschiddenen Disziplinne matgemaach.
De leschten Dag war voller Emotiounen, wéi d'Participanten hir Projeten een nom aneren ofgeschloss hunn. Ee vun deenen éischte Lëtzebuerger Participanten, déi fäerdeg waren, war de Jannik Bares, dee säi Projet an der Sanitär- an Heizungsinstallatioun e puer Stonne virum offiziellen Enn vun der Competitioun ofgeschloss huet.
"Den éischten Dag war ganz schwéier, mee déi lescht zwee an en hallwen Dag waren absolut an der Rei. Ech si gutt eens gi mam Plang. Alles ass esou gelaf, wéi et sollt lafen", seet de Jannik.
Éier d'Resultater annoncéiert goufen, huet hie gehofft, datt säi Projet genuch wier, fir eng sougenannten 'Medal of Excellence' ze gewannen, eng Leeschtung, déi hie scho bei den Euroskills an Dänemark am Joer 2025 erreecht hat. Déi kritt ee fir eng exzellent Leeschtung an ee ganz héije Punktestand, och wann et net fir eng vun den éischten dräi Plazen duergaangen ass.
Nieft him stoung de Loïc Perrin, den Expert, deen de Jannik déi lescht zwee Joer begleet huet. Hien huet sech schwéier gedoen, seng Tréinen zréckzehalen.
"Mir hunn d'Euroskills gemaach, mir hunn d'Worldskills gemaach, hien huet dat super gutt gemaach. Ech sinn immens zefridde mat him, extrem houfreg op hien. Hien wäert och nach spéider e Bestanddeel vu mengem Liewe sinn. Ech wäert probéieren, hien a mäin Expertenteam bei de Concoursen ze kréien".
An engem anere Pavillon hunn de Bjarne Weber an de Florian Theisen sech getommelt, fir eng Bréck am asiatesche Gaart opzebauen, dee si gebaut haten. Mat nach just fënnef Minutten op der Auer huet all Sekonn gezielt, wéi si d'Planze gewässert, d'Gras arrangéiert, de Buedem propper gemaach an den Dreck ewech geraumt hunn.
Wéi déi leschte Sekonnen agelaut goufen, sinn si ugefeiert gi vun den Zuschauer am Pavillon. Mat Succès - D'Lëtzebuerger Equipe huet de Gaart fäerdeg kritt.
"Hei ass et nach eng Kéier e bësse méi stresseg ginn, well mir um zweeten Dag e bësse Réckstand kritt hunn, well mir deen Dag leider net fäerdeg kruten. Awer mir wollten dann éischter op d'Optik setzen, amplaz d'Punkte matzehuelen, déi een huele kann," seet de Florian. "Et war op jidder Fall elo zum Schluss ustrengend ginn. An d'Zäit war och mega mega knapp. Awer trotzdeem hu mir alles geschaaft".
De William Cao huet och säi Concours am Beräich Digital Konstruktioun ofgeschloss, erëm ënnert dem Support an de Riff vun der Lëtzebuerger Delegatioun.
"Et ware véier onvergiesslech Deeg. Déi wäert ech ni méi a mengem Liewe vergiessen. Si waren och ganz schwéier. Also den Testprojet war op engem ganz héijen Niveau. De leschten Dag ass awer am Fong ganz gutt gaangen. An, jo, also d'Stëmmung hei, wou et um Schluss war, déi lescht fënnef Minutten, wéi jiddereen hei gejubelt huet an esou, dat war eng Stëmmung. Also déi wäert ech och ni méi vergiessen."
De leschte vun de Lëtzebuerger Kandidaten, dee fäerdeg gouf, war den 18 Joer ale Karim Speidel, deem seng lescht Erausfuerderung am Restaurant-Service war, e komplette Plat ze zerwéieren, dorënner de Plat, de Wäin, de Dessert an de Kaffi.
De Karim huet d'Fraen als éischt bedéngt — e weidere klengen Detail an engem Concours, wou all Detail zielt.
Hien huet seng Aufgaben e puer Minutte virum Oflaf vum Zäitlimitt ofgeschloss. Wéi de Countdown bei Null ukomm ass, huet hie säi Coach empfaangen an ass emotional ginn, wéi dat véier Deeg laangt Abenteuer eriwwer war.
"Am Ufank sinn ech heihi komm mam Zil, dass ech hei gutt ofschneiden an natierlech och fir nei Leit kennen ze léieren. An ech mengen no dëse véier Deeg kann ech wierklech soen, dass ech dat erreecht hunn. Ech sinn och immens frou, dass ech esou vill mat erliewe konnt, esou vill nei Leit kennegeléiert hunn. An ech hoffen och, dass ech dat fir de Rescht vu mengem Liewe mat dëse Leit weiderféiere kann, eng gutt Verbindung mat hinnen oprecht hale kann",seet de Karim. “Egal wéi ee Resultat, sinn ech frou”.
Den 27. September war d'Ofschlosszeremonie zu Shanghai, wou d'Gewënner annoncéiert goufen.
De Jannik Bares, ee vun de sechs Kandidaten, déi Lëtzebuerg vertrueden hunn, krut eng 'Medal of Excellence' fir säi Projet am Sanitär- an Heizungsberäich.
Fir den 21 Joer jonke Lëtzebuerger war dat Resultat eng grouss Belounung um Enn vum Concours: "Ech fille mech ganz gutt. Mat der Exzellenzmedail hunn ech bal e bësse gerechent. Awer datt ech gläichzäiteg och nach besser ofgeschnidden hunn a fir Best of Nation qualifizéiert sinn, ass natierlech och eng grouss Éier. An, jo, ech freeë mech einfach."
China war d'Gaaschtland an huet déi meescht Goldmedaile gewonnen, mat méi wéi der Hallschent vu senge Participanten, déi eng kritt hunn. Och Korea huet eng staark Leeschtung gewisen, gefollegt vu China, Taipei an der Schwäiz.
D'Worldskills zu Shanghai war eng vun de gréissten Editioune vun der Competitiounen mat ronn 800.000 Visiteuren an iwwer 400.000 Quadratmeter Ausstellungsfläch am 'National Exhibition and Convention Center', eng vun de gréisste Foireshalen op der Welt.
Fir d'Claudine Thoma, d'Technesch Delegéiert vu Worldskills Lëtzebuerg, markéiert dem Jannik seng 'Medal for Excellence' e wichtege Schrëtt fir d'Land.
"Ech mengen dat weist einfach, dass alles wat mer elo gemaach hunn a wat mer maachen, wéi staark eis Beruffsausbildung zu Lëtzebuerg ass. Et weist awer och, dass all déi Efforten, déi vun hiren Experten, déi vun eiser Equipe, vun de Betriber all Dag gemaach ginn, dass déi ufänke Friichten ze droen. Sou eppes geet natierlech net vun haut op muer, mee et gëtt eis awer ganz vill Hoffnung an et gëtt eis eng onheemlech Motivatioun, fir genee op deem Wee weiderzemaachen", seet d'Claudine Thoma.
"Wéi mir ëmmer soen, mir wëllen net onbedéngt déi beschte Competiteurë forméieren, mee déi beschte Professioneller, et ass dat op dat et herno ukënnt."
D'Lëtzebuerger Delegatioun bereet sech schonn op déi nächst Euroskills vir, déi d'nächst Joer zu Düsseldorf sinn. Lëtzebuerg wäert an nach méi Disziplinne mat nach méi Kandidate wéi jee virdrun untrieden.
*An enger éischter Versioun vum Artikel gouf geschriwwen, dass et déi éischt Medail fir Lëtzebuerg op enger Worldskills-Competitioun war. Do hate mer eng falsch Informatioun kritt an hunn et nodréiglech verbessert.
