Am Spëtzematch vun den Aachtelsfinallen an der Coupe de Luxembourg krut den HB Käerjeng Besuch vum HC Bierchem. An et waren d’Gäscht déi sech no 60 Minutte kenne mat 31:25 zu Käerjeng duerchsetzen an esou eng Ronn weider sinn. Vun Ufank un war Bierchem a Féierung. An der Paus louch e mat 4 Goler am Avantage (16:12). No der Paus sollt et bis zur 49 Minutt dauere bis d’Lokalekipp esou richteg am Match war. Ënnert dem Impuls vum Danijel Vukicevic ass ee bis op 1 Gol eru komm (22:23). Mat engem 3:0-Laf vum Leon Biel a Yann Hoffmann huet Bierchem de Käerjenger awer déi lescht Hoffnung geholl, a gewënnt no 60 Minutte verdéngt mat 31:25 zu Käerjeng.
Hei konnt sech am fréie Mëtteg den HB Museldall an eegener Hal mat 39:25 géint Réiden duerchsetzen. Dobäi war et virun allem an der éischter Hallschent eng immens spannend Partie, bei där Museldall mat nëmmen 1 Punkt Virsprong (17:16) an d’Kabinne gaangen ass. Beschte Scorer bei der Lokalekipp war den Enis Behlulaj mat 11 Goler.
Am drëtte Match vum Owend huet Bieles doheem eng däitlech Néierlag missen astiechen. Mat 16:44 verléiert d’Ekipp aus der Promotioun géint Schëffleng aus der AXA League.
Am spéiden Owend hat de Standard dunn nach Besuch vum HB Diddeleng. Hei gouf et eng däitlech 15:38 (8:23) Néierlag fir d’Lokalekipp. Diddeleng steet domat an der 1/4-Finall.
Um Sonndeg huet Miersch géint Rëmeleng mat 40:33 gewonnen.
Péiteng aus der Promotioun huet sech géint de CHEV Dikrech just knapp mat 24:27 misse geschloe ginn.
