De Ruben Querinjean huet e Samscheg déi 2. Editioun vun der "Lëtz Mile" an der Stad gewonnen. De Vizeeuropameeschter iwwer 3.000 Meter Steeple huet d'Course bei der Elitt dominéiert a sech mat engem neie Lëtzebuerger Rekord iwwer d'Meil d'Victoire geséchert. De Chrono ass no véier Minutten, zwou Sekonnen an 30 Honnertstel stoe bliwwen.
Bei den Dammen gewënnt d'Belsch Mariska Parewyck. D'Lëtzebuergerin Marine Joblin huet sech op der fënnefter Plaz klasséiert.
Fir d'Lëtzebuerger war d'Lëtz Mile eng Preparatioun op d'WM op der Strooss den nächste Weekend zu Kopenhagen an Dänemark. Mam Ruben Querinjean, Fidelio Klein, Vera Bertemes-Hoffmann a Marine Joblin gi véier Lëtzebuerger iwwer d'Meil (1,609 Kilometer) un den Depart.
