De soziokulturellen Zentrum “Prabbeli” zu Wooltz lancéiert dëse Weekend en neie Festival. E Festival, wou een op d’Rees duerch d’Welt vum Jazz ka goen. Den “Jazzorwhatever?!” wëll Diversitéit a Jazzvariatiounen an de Fokus stellen an dat mat engem ganz internationale Line-up. Vun klassesche Melodien, zäitgenësseschen Beats an elektroneschen Téin. All d’Concerte sinn am Brandbau zu Wooltz.
D’Kontrabassistin Anneleen Boehme ass net méi aus der belscher Jazz-Zeen ewechzedenken. Bekannt ginn ass si duerch de belsche Jazztrio LABtrio, an deem si als Bassistin spillt.
Den Trio ronderëm de Pianist Wajdi Riahi ass eng Kombinatioun aus zwou Welten: Tuneesescht Iewe gëtt hei mat der Passioun fir de Jazz verbonnen.
D’Esinam ass eng belsch-ghanesch Multi-Instrumentalistin. Di mécht vill musikalesch Connectiounen tëschent de Kulturen an de Genren a beweegt sech esou tëschent dem Akusteschem an dem Elektroneschem.
Bei der hollännescher Band Radiohop vermësche sech Fusion/Hip Hop mam Jazz. D’Band probéiert, nei Sounds ze exploréieren a sech dobäi vun de Legenden aus der Musekswelt ze inspiréieren.
Aka Moon ass eng belsch Fusionband, di 1992 gegrënnt ginn ass. Den Trio bréngt Jazz, Rock a Weltmusek zesummen.
Di lëtzebuergesch Band LINQ schafft genreiwwergräifend. De Quintett mam Mateus Wojda, John Wolter, Pit Dahm, Pierre Cocq-Amann an dem Gilles Grethen, definéiert sech duerch moderne Fusionjazz.
De Kuna Maze alias Edouard Gilbert ass zu Bréissel baséiert a fokusséiert sech op elektronesch Bassmusek. Den a Frankräich gebuere Produzent, DJ a Multi-Instrumentalist huet seng Inspiratioun aus der Beat-Zeen vu Los Angeles fonnt, ier e säi Spektrum dann nach weider entwéckelt huet. Den Jazz ass awer säin zentrale Punkt an der Musek.
