E Méindeg den Owend hu sech d’Organisateure vun den dräi Kulturhaaptstied 2022 mat hire Successeure vun der Editioun 2023 zu Athen fir d’Iwwerreechungszeremonie zesummefonnt. Am Kader vun dëse Feierlechkeete gouf unhand vun enger Skulptur den Titel vun der Kulturhaaptstad symbolesch iwwerreecht.
An dësem Joer zitt et d’Visiteuren a Griichenland (Elefsina), Rumänien (Timisoara) an Ungarn (Veszprém).
D’Skulptur, déi dëst Joer iwwerreecht gouf, ass vun der Lëtzebuerger Glaskënschtlerin Pascale Seil kreéiert ginn. E Wierk, dat ganz am Zeeche vun der Geschicht an de Wäerter vun Europa steet.
D’Statu soll e stiliséierte Stéier duerstellen. Eng Uspillung un de Mythos vum Zeus, dee sech an e Stéier verwandelt hat, fir Europa ze entféieren. Weider “ass Glas duerchsichteg, wat un d’Transparenz an Europa soll erënneren”, sou d’Kënschtlerin.
