D’Äerderwiermung, fir déi de Mënsch responsabel ass, schiedegt d’Mierer an d’Äismassen massiv an dat huet Konsequenzen, déi een net méi ka réckgängeg maachen.
A Küsteregiounen an op Insele wäert een deels net méi kënne liewen. An an der Antarktis kéint d’Äis irreversibel onstabil ginn. Dat kéint de Mieresspigel bannent Joerhonnerten ëm e puer Meter klammen doen. Et wär nach onkloer, ob a wéini et souwäit ass, sou de Rapport vum Weltklimarot.
De Mieresspigel klëmmt dem Rapport no ëmmer méi séier, den Ament mat 3,6 Milimeter d’Joer.
A Küsteregioune bis zu 10 Meter héich wunne 680 Millioune Mënschen, op klengen Inselstaaten 65 Millioune Leit. 4 Millioune Mënsche liewen dauerhaft an der Arktis.
An de Bierger, wou Gletscher riskéieren ze schmëlzen, klëmmt de Risiko vu Lawinen. Wann d’Gletscher ganz géife verschwannen, géif dat och e Problem bedeite mat der Drénkwaasserversuergung.
Déi méi héich Bierger sinn d’Doheem vu 670 Millioune Mënschen.
