A Frankräich an an Holland goufen op en Neits eng sëllege Flich gestrach, wärend de staarke Schnéi a Serbien d’Stroumversuergung ënnerbrach huet. A Frankräich si fënnef Leit duerch Accidenter op der Strooss gestuerwen an och a Bosnien koum eng Fra ëm d’Liewen.
Zu Lëtzebuerg warnt d’Meteolux e Mëttwoch viru Schnéi. D’Alerte Jaune gëllt vun 13 bis 23 Auer fir dat ganzt Land.
Am Südweste vu Frankräich sinn den Autoritéiten no en Dënschdeg de Moien dräi Mënsche bei Verkéiersaccidenter ëmkomm, déi duerch Glatäis verursaacht goufen. Am Groussraum Paräis ass an der Nuecht een Taxichauffer am Spidol gestuerwen, nodeems hie mat sengem Auto an de Floss Marne gefall war. Säi Passagéier huet iwwerlieft, huet awer misse wéinst Ënnerkillung traitéiert ginn. Ëstlech vu Paräis koum ee Chauffer no enger Kollisioun mat engem Camion ëm d’Liewen.
Och de Fluchverkéier a Frankräich war weider staark ageschränkt. Un de Paräisser Fluchhäfe Roissy-Charles de Gaulle (CDG) an Orly goufe vun Dënschdeg de Moie bis an de fréien Nomëtteg eng sëllege Flich annuléiert, huet de franséische Verkéiersminister matgedeelt. Um Fluchhafen CDG waren eng 45 Prozent vun de Flich betraff, um Fluchhafen Orly waren et eng 25 Prozent. Schonn e Méindeg waren op béide Plazen eng 15 Prozent vun de Flich ofgesot ginn.
Am Norden an am Weste vu Frankräich huet en Dënschdeg wéinst Glatäis déi zweethéchst Alarmstuf gegollt. Sechs méi kleng Fluchhäfe waren an dëse Regiounen zou. Op ville Plaze sinn d’Schoulbusser ausgefall. Virun allem am Weste war den Zuchverkéier impaktéiert, eng Rei Linne ware komplett gespaart. Den TGV ass méi lues gefuer.
De franséische Verkéiersminister Tabarot huet dem Wiederdéngscht virgeworf, de Schnéi ënnerschat ze hunn. Et wiere just dräi Zentimeter gemellt gewiescht, ma et wieren der bis zu aacht gefall. An de betraffene Gebitter, wéi zum Beispill un der Atlantikküst, ass Schnéi seelen.
An Holland goufen en Dënschdeg op en Neits eng sëllege Flich, déi net gestart sinn. Um Amsterdamer Fluchhafe Schiphol goufen en Dënschdeg iwwer 400 Flich gestrach. D’Zich vun der hollännescher Zuchgesellschaft NS konnten eréischt vun 10 Auer u fueren.
Och Groussbritannien huet an der Nuecht gutt gefruer - et war déi keelsten Nuecht bis ewell dëse Wanter, mellt hire Wiederdéngscht. Am ostengleschen Norfolk goufe - 12,5 Grad Celsius gemooss.
A Schottland sinn iwwer 300 Schoulen zou bliwwen, wéi d’BBC bericht. Och den Zuchverkéier a Schottland war staark impaktéiert. Am schotteschen Aberdeen an am englesche Liverpool sinn awer op d’mannst nees Fligere geflunn, nodeems déi den Dag virdrun hate missen zou maachen.
