An de Spideeler maache sech déi héich Neiinfektiounen och esou lues bemierkbar.

Virun allem beim Personal ginn Enkpäss gefaart, well eng Partie Leit entweder selwer positiv getest goufen oder a Quarantän sinn, well si Kontakt mat enger infizéierter Persoun haten. Fir ze diskutéieren, wéi sech d'Spideeler organiséiere wëllen, hu sech d'Vertrieder vun de 4 Klinicken en Donneschdeg mam Santésministère getraff. RTL-Informatiounen no wier een um Punkt, d'Phas 3 ze declenchéieren. Dat bedeit, dass net dréngend Aktivitéite limitéiert ginn.

Situatioun an de Spideeler / Reportage Monica Camposeo

Aktuell wier d’Personal de kritesche Punkt, wann et ëm d’Garantéiere vum Fonctionnement vum Spidol geet, betount den Dr. Claude Schummer. Vum ganze Personal wieren aktuell an den Hôpitaux Robert Schumann 14 Persoune positiv getest ginn an domadder an Isolement. Weider 22 Persoune sinn a Quarantän. Dës Persoune feelen den Ament also um Terrain.

Och wann d'Situatioun an de Spideeler nach stabel wier, déi héich Neiinfektiounen hätten en Impakt op d'Fonctionnement vum Spidol, seet och den Dr. Claude Braun, medezineschen Direkter vun den Hôpitaux Robert Schumann.

"Also bis elo war d'Strategie gewiescht, déi geplangten Aktivitéit vun der Klinik esou wäit wéi méiglech weider ze maachen. Mä et ass evident, et ass reng Mathematik, wann ech Stäck muss zoumaachen, fir do d'Covid-Patienten ze versuergen, da geet dat zu Laaschte vun aneren Aktivitéiten. An dat ass eben déi geplangten Aktivitéit, am Wesentlechen d'Chirurgie, déi orthopedesch Aktivitéit, all Saachen, déi geplangt sinn an elo keng vital Urgencen duerstellen."

Extrait Dr. Braun

Et wéilt een awer onbedéngt verhënneren, dass d'Aktivitéit wéi am Fréijoer op Null muss erofgefuer ginn.

Och am CHL géing ee scho mierken, dass Personal verstäerkt wéinst Covid-19 feelt. Den Ament géingen hei vum ganze Personal ronn 30 Persoune feelen, well si sech mam Coronavirus ugestach hunn. Dobäi komme ronn 60 Persounen, déi a Quarantän sinn, well si Kontakt mat enger positiv getester Persoun haten, esou den Dr. Romain Nati, Generaldirekter vum Centre Hospitalier de Luxembourg am RTL-Interview.

"Mer sinn nach ëmmer an der Phas 2, mä soe mer mol, an der Phas 2 si mer méi no bei der Phas 3 wéi bei der Phas 1, wann ech dat esou däerf ausdrécken. Mer hunn nach e bësse Sputt, ier mer eis mussen iwwerleeën, wat mer net méi maachen, wat mer normalerweis géife maachen an engem normale Spidolsoflaf.

Wann et dann esouwäit ass, dass mer net méi, niewent der Betreiung vu Covid-Patienten, déi alldeeglech Betreiung vu Patiente kënne weidermaachen, wäerte mer kucken, Aktivitéiten ze reportéieren, wou mer sécher sinn, dass et keng Perte de chance fir de Gesondheetszoustand vun de betraffene Leit bréngt."

Extrait Dr. Nati